ఓవైపు క‌రోనా, మ‌రో వైపు వ‌ర్షాలు. షూటింగుల‌కు ఆటంకంగా మారాయి. స్టార్ హీరోలు సినిమా షూటింగుల‌కు సిద్ధంగా లేరు. చిరంజీవి, వెంక‌టేష్‌, సినిమాల షూటింగులు మ‌ధ్య‌లోనే ఆగిపోయాయి. అన్నీ సిద్ధంగా ఉన్నా… హీరోలు మాత్రం స‌న్న‌ద్ధంగా లేక‌పోవ‌డంతో ఈ స‌మ‌స్య‌.

బాల‌కృష్ణ సినిమా ప‌రిస్థితి వేరు. ఆయ‌న సిద్ధంగానే ఉన్నా, బోయ‌పాటి మాత్రం `రెడీ` కాలేదు. బాల‌కృష్ణ – బోయ‌పాటి శ్రీ‌ను కాంబినేష‌న్‌లో ఓ సినిమా తెర‌కెక్కుతున్న సంగ‌తి తెలిసిందే. ఈ సినిమా షూటింగ్ అప్ డేట్ కోసం నంద‌మూరి ఫ్యాన్స్ ఆస‌క్తిగా ఎదురు చూస్తున్నారు. కానీ… షూటింగు ఎప్పుడు మొద‌ల‌వుతుందో చెప్ప‌లేని ప‌రిస్థితి. దానికి కార‌ణం.. ఇత‌ర న‌టీన‌టులు, సాంకేతిక నిపుణుల ఎంపిక లో ఇంకా స్ప‌ష్ట‌త రాక‌పోవ‌డ‌మే. ఈ సినిమాలో హీరోయిన్ ఇంకా ఖ‌రారు కాలేదు. ఈమ‌ధ్య ఓ పేరు బ‌య‌ట‌కు వ‌చ్చినా, ఆమెను ఎంపిక చేసుకోవాలా? వ‌ద్దా? అనే విష‌యంలో బోయ‌పాటి ఇంకా ఓ నిర్ణ‌యానికి రాలేద‌ని తెలుస్తోంది. గ‌త నెల రోజులుగా బోయ‌పాటి ఆఫీసులో ఈ సినిమా హీరోయిన్ కోసం ఆడిష‌న్స్ చేస్తూనే ఉన్నార్ట‌. అయినా… ఇంకా ఖ‌రారు చేయ‌లేక‌పోయారు. ఈ సినిమాలో విల‌న్ ఎవ‌రు? అనే విష‌యంలోనూ స్ప‌ష్ట‌త లేదు. కెమెరామెన్‌, ఫైట్ మాస్ట‌ర్లు, సంగీత ద‌ర్శ‌కుడు.. త‌ప్ప మ‌రెవ్వ‌రి పేర్లూ ఖ‌రారు కాలేద‌ని, అవ‌న్నీ ఫైన‌ల్ అయి, వాళ్ల కాల్షీట్లు దొరికితే త‌ప్ప – షెడ్యూల్ సెట్ చేయ‌డం కుద‌ర‌ద‌ని తెలుస్తోంది. ద‌స‌రా పండ‌గ త‌ర‌వాత షూటింగ్ ప్రారంభించాల‌ని బాల‌య్య భావిస్తున్నార‌ని, అప్ప‌టికి ఈ వ్య‌వ‌హారాలు ఓ కొలిక్కి వ‌స్తాయ‌ని చిత్ర‌బృందం న‌మ్ముతోంది.