‘హ‌నుమాన్’ త‌ర‌వాత ప్ర‌శాంత్ వ‌ర్మ రేంజ్ పెరిగింది. త‌న త‌దుప‌రి సినిమా బాలీవుడ్ లోనే అనే ప్ర‌చారం జ‌రిగింది. ర‌ణ‌వీర్ సింగ్ – మైత్రీ మైవీస్ కాంబోలో ర‌ణ‌వీర్ చిత్రం ప‌ట్టాలెక్కాల్సింది. కానీ కొన్ని కార‌ణాల వ‌ల్ల ఆగిపోయింది. దాంతో ఇప్పుడు ప్ర‌శాంత్ వ‌ర్మ మ‌ళ్లీ ‘హ‌నుమాన్ 2’పై ఫోక‌స్ మొద‌లెట్టాడు. ఈ చిత్రాన్ని వీలైనంత త్వ‌ర‌గా ప‌ట్టాలెక్కించే ప‌నిలో ఉన్నాడు ప్ర‌శాంత్ వ‌ర్మ‌.

అయితే ఇటీవ‌ల ప్ర‌శాంత్ వ‌ర్మ ర‌వితేజ‌ను క‌లిశారు. వీరిద్ద‌రి మ‌ధ్య ఎలాంటి చ‌ర్చ జ‌రిగింది? అనేది ఆస‌క్తిక‌రంగా మారింది. ‘హ‌నుమాన్ 2’లో ర‌వితేజ క‌నిపించే ఛాన్స్ ఉందా? ఉంటే ఎలాంటి పాత్ర‌? అనే దిశ‌గా ప్ర‌శ్న‌లు మొద‌ల‌య్యాయి. హ‌నుమాన్ పాత్ర కోసం ఓ స్టార్ హీరోని ఎంచుకోవాల‌ని ప్ర‌శాంత్ వ‌ర్మ భావిస్తున్నాడు. ఆ స్టార్ హీరో ర‌వితేజ‌నా? లేదంటే.. ‘హ‌నుమాన్ 2’లోని మ‌రో కీల‌క పాత్ర కోసం ర‌వితేజ‌ను సంప్ర‌దించారా? అనే విష‌యాలు తెలియాల్సివుంది. తేజా స‌జ్జా ప్ర‌స్తుతం ‘మిరాయ్‌’ చేస్తున్నాడు. 2025లో ఈ చిత్రం ప్రేక్ష‌కుల ముందుకు వ‌స్తోంది. ఈలోగానే ‘హ‌నుమాన్ 2’ ప‌ట్టాలెక్కొచ్చు.