సాయిధ‌ర‌మ్ తేజ్ కెరీర్ ఏమాత్రం బాగోలేదు. వ‌రుస ఫ్లాపులు బాగా ఇబ్బంది పెట్టేశాయి. ఇప్పుడు వి.వి.వినాయ‌క్‌తో క‌ల‌సి ‘ఇంటిలిజెంట్‌’ సినిమా తీసినా… దానికి రావ‌ల్సినంత హైప్ రాలేద‌న్న‌ది వాస్త‌వం. టీజ‌రో, ట్రైల‌రో వ‌స్తే.. అది బ్ర‌హ్మాండంగా ఉంటే.. అప్పుడేమైనా మాట్లాడుకుంటారేమో చూడాలి. ఫిబ్ర‌వ‌రి 9న ఈ సినిమా విడుద‌ల కాబోతోంది. అయితే ఇప్ప‌టి వ‌ర‌కూ బిజినెస్ మొద‌లవ్వ‌లేదు. వినాయ‌క్ ని చూసుకుని మురిసిపోతున్న క‌ల్యాణ్‌.. రేట్లు ఎడా పెడా పెంచేశార‌ని టాక్‌. ఒక్క నైజాంకే రూ.9 కోట్ల‌కు ఈ సినిమా అమ్మాల‌ని చూస్తున్నాడ‌ట‌. సాయిధ‌ర‌మ్ తేజ్ ని చూసి రూ.9 కోట్ల‌కు ఎవ‌రు కొంటారు? అందుకే ఆస‌క్తి ఉన్నా, బ‌య్య‌ర్లు ఈ సినిమావైపు చూడ‌డం లేదు. దాదాపు అన్ని ఏరియాల్లోనూ ఎక్కువ రేట్లు చెబుతున్నార్ట‌. ‘సాయిధ‌ర‌మ్‌కు అంత మార్కెట్ లేదు.. ఇలా రేట్లు చెప్పి భ‌య‌పెడితే ఎవ‌రూ కొన‌రు’ అని సి.క‌ల్యాణ్‌కి వినాయ‌క్ స‌ల‌హా ఇస్తున్నా… ఆయ‌న ప‌ట్టించుకోవ‌డం లేద‌ని తెలుస్తోంది. జై సింహాతో క‌ల్యాణ్‌కి ఓ హిట్టు ప‌డింది. ఆ సినిమాని దాదాపుగా అన్ని ఏరియాల్లోనూ సొంతంగానే విడుద‌ల చేసుకున్నాడు. రేపు.. `ఇంటిలిజెంట్‌`కీ ఇదే ప‌రిస్థితి వ‌స్తుందేమో?