వెనుకబడిన జిల్లాలకు నిధులు ఇచ్చి వెనక్కి తీసుకున్న కేంద్రం.. ఇప్పుడు మరోసారి ఏపీని అవమానించింది. తెలంగాణకు రూ. 450 కోట్లను విడుదల చేసి ఏపీ విషయాన్ని పెండింగ్ లో పెట్టింది. అసలు ఏపీ గురించి ఆలోచనే లేదన్నట్లుగా కేంద్రం స్పందిస్తోంది. తెలంగాణకు వెనుకబడిన జిల్లాలకు చెల్లించాల్సిన నిధుల కింద రూ. 450 కోట్లను వారం క్రితమే విడుదల చేసింది. నిధులు విడుదల చేసిన వారానికి ఉత్తర్వులు రిలీజ్ చేసారు. ఆంధ్రప్రదేశ్ విషయంలో మాత్రం కేంద్రం ఎలాంటి నిర్ణయమూ తీసుకోలేదు. ఈ ఏడాది మార్చిలో మొత్తం ఏడు జిల్లాలకు విడుదల చేసిన 350 కోట్లను మోదీ ప్రభుత్వం వెనక్కి తీసుకుంది. అంతకుముందు విడుదల చేసిన నిధులకు సంబంధించిన యూసీలు, ఖర్చుల వివరాలు అందించని కారణంగా వాటిని వెనక్కి తీసుకుంటున్నట్టు కేంద్రం గతంలో వెల్లడించింది. దీంతో తక్షణమే స్పందించిన రాష్ట్ర ప్రభుత్వం మార్చి నెలాఖరు కల్లా యూసీలు, ఖర్చుల వివరాలను అందించింది. ఆర్నెళ్లు గడుస్తున్నా ఈ నిధుల విడుదలకు సంబంధించి ఎలాంటి నిర్ణయం తీసుకోలేదు.

ఇచ్చిన నిధులను వెనక్కి తీసుకోవడం అంటే ఏపీని అవమానించడమేనని టీడీపీ తీవ్ర స్థాయిలో నిరసన తెలిపింది. విభజన చట్ట ప్రకారం రాయలసీమలో 4, ఉత్తరాంధ్రలో మూడు వెనుకబడిన జిల్లాలకు ప్రత్యేక ప్యాకేజీ ఇవ్వాలి. అదీ మధ్యప్రదేశ్‌-యూపీ బుందేల్‌ఖండ్‌, ఒడిసా కేబీకే తరహా ప్యాకేజీ ఇవ్వాలి. కానీ జిల్లాకు యాభై కోట్ల చొప్పున విడుదల చేస్తున్నారు. అవి కూడా మూడేళ్లు ఇచ్చి నాలుగో ఏడు ఇచ్చినట్లే ఇచ్చి వెనక్కి తీసుకున్నారు. అసలు ఏపీ ఖాతాలో నిధులు వేసిన తర్వాత.. ప్రధానమంత్రి అంగీకరించలేదన్న కారణంగా వెనక్కి తీసుకున్నారు. తర్వాత యూసీలు సమర్పించలేదని కారణంగా చెప్పారు. అసలు యూసీలు సమర్పించిన తర్వాతే నిధులు విడుదల చేస్తారని.. చేసిన తర్వాత వెనక్కి తీసుకోవడం ఏమిటని టీడీపీ నేతలు ఆరోపణలు గుప్పిస్తున్నారు.

ఏపీపై.. కేంద్రం కక్ష గట్టిందని.. ఇప్పటికే టీడీపీ విస్తృతంగా ప్రచారం చేస్తోంది. ఇలాంటి సమయంలో కూడా… కేంద్రం ఎన్నికలు జరుగుతున్న తెలంగాణ పట్ల ఓ రకంగా.. ఎన్నికలు లేని.. ఏపీ పట్ల మరో రకంగా వ్యవహరించడంపై విమర్శలు వినిపిస్తున్నాయి. దీనిపై మరింతరాజకీయ రగడ చోటు చోటు చేసుకునే అవకాశం కల్పిస్తోంది. ఏపీపై కేంద్రం కక్ష కట్టిందనే విమర్శలను తనకు తానే నిజం చేసుకుంటోంది..!