అవకాశాల కోసం ఎదురు చూడకుండా.. సృష్టించుకునేవారే ముందుకెళ్తారు. ఈ విషయాన్ని తండ్రి, కుమారులు చంద్రబాబు, లోకేష్ చాలా మంది కంటే ఎక్కువగానే గుర్తించారు. అందుకే ఏ వైపు నుంచి చాన్స్ ఉంటుందని అనుకున్నా.. అక్కడి నుంచి ప్రయత్నాలు చేస్తున్నారు. దీనికి సాక్ష్యం.. చాట్ జీపీటీ సృష్టికర్త శామ్ అల్ట్ మన్ పెట్టిన ట్విట్టర్ పోస్టుపై వీరిద్దరూ స్పందించిన వైనమే.

ఇండియాలో ఆర్టిఫిషియల్ ఇంటలిజెన్స్ ను ఉపయోగించుకుంటున్న తీరు అద్భుతమని శామ్ ఆల్ట్‌మన్ బుధవారం ఓ ట్వీట్ పెట్టారు. ఈ ట్వీట్ పై నారా లోకేష్ స్పందించారు. ఇండియాలో ఆంధ్రప్రదేశ్ ఏఐలో ఎమర్జింగ్ పొజిషన్ లో ఉందని.. ఏఐ రంగంలో అవకాశాలను ఎక్స్‌ప్లోర్ చేయాలని లోకేష్ పిలుపునిచ్చారు. రాష్ట్రంలో యువతకు మరిన్ని ఉద్యోగాలను సృష్టించడానికి మన రాష్ట్రంలో AI వృద్ధిని పెంపొందించడానికి మా ఎకో సిస్టమ్‌ను మెరుగుపర్చడానికి, నేర్చుకోవడానికి ఆసక్తిగా ఉన్నామని పిలుపునిచ్చారు.

తర్వాత చంద్రబాబు కూడా స్పందించారు. ఏఐ రంగంలో భారతదేశం ప్రయాణాన్ని ఇప్పుడే ప్రారంభిస్తోందని.. అలాగే ఆంధ్రప్రదేశ్ AI-ఆధారిత పురోగతికి కేంద్రంగా మారడానికి సిద్ధంగా ఉందని చంద్రబాబు ట్వీట్ చేశారు. మీ తదుపరి భారతదేశ పర్యటనలో అమరావతికి ఆహ్వానిస్తున్నామన్నారు. కేవలం AI మాత్రమే కాదు; ఆంధ్రప్రదేశ్ క్వాంటం టెక్నాలజీలో కూడా నాయకత్వం వహించడానికి సిద్ధంగా ఉందన్నారు.

చంద్రబాబు,లోకేష్ ట్వీట్లపై శామ్ అల్టమన్ స్పందించి.. ఆయన ఇండియా పర్యటనలో ఆంధ్రప్రదేశ్ కు వస్తే.. ఏఐ రంగంలో ఏపీకి మంచి ప్రారంభం అవుతుందని అనుకోవచ్చు.