ఒక‌ప్పుడు శంక‌ర్ సినిమా అన‌గానే అటెన్ష‌న్ మొద‌లైపోయేది. ‘ఈసారి కూడా బ్ర‌హ్మాండం బ‌ద్ద‌లు కొడ‌తాడు’ అన్న‌ట్టుగానే త‌న సినిమా కోసం అభిమానులు ఎదురు చూసేవారు. హీరో ఎవ‌రైనా స‌రే, అది శంక‌ర్ సినిమానే. ఆ న‌మ్మ‌కాన్ని శంక‌ర్ నిల‌బెట్టుకొంటూ వ‌చ్చాడు. ఒక‌దాన్ని మించి మ‌రో హిట్.. కొట్టుకొంటూ వెళ్లాడు. త‌న సినిమాలు విజువ‌ల్ ఫీస్ట్ లుగా నిలిచిపోయాయి. పాట‌ల‌పై త‌ను పెట్టిన శ్ర‌ద్ద అంతా ఇంతా కాదు. టేకింగ్ లో, మేకింగ్‌లో, క‌థ‌ల ఎంపిక‌లో ఎప్పుడూ కొత్త పంథాని చూపించేవాడు. అయితే కొంత‌కాలంగా శంక‌ర్ మ్యాజిక్ త‌గ్గిపోయింది. శంక‌ర్ త‌ర‌వాత అడుగులు వేసిన రాజ‌మౌళి, సుకుమార్ లాంటి వాళ్లు శంక‌ర్‌ని మించిన సినిమాలు తీసి వావ్ అనిపించుకొన్నారు. ఈ రేసులో శంక‌ర్ బాగా వెనుక‌బ‌డ్డాడు. త‌న సినిమా ఫ‌లితాలు కూడా అంద‌రినీ నిరాశ ప‌రిచాయి. ఒకేసారి రెండు సినిమాలు ‘గేమ్ ఛేంజ‌ర్‌’, ‘భార‌తీయుడు 2’ ప‌ట్టాలెక్కించినా అవి స‌కాలంలో పూర్తి కాలేదు. వాయిదాల ప‌ర్వం వ‌ల్ల‌… ఆయా సినిమాల‌పై ఆస‌క్తి కూడా త‌గ్గింది. ముఖ్యంగా ‘భార‌తీయుడు 2’ చుట్టూ వివాదాలు న‌డిచాయి. ఈ సినిమాని అయిష్టంతోనే శంక‌ర్ పూర్తి చేస్తున్నాడ‌ని, ఏదో చుట్టేసి ‘మ‌..మ‌’ అనిపించుకోబోతున్నాడ‌ని వార్త‌లొచ్చాయి. దానికి తోడు ‘పార్ట్ 3’ గోల ఒక‌టి. ‘పార్ట్ 2’ క‌మ‌ల్ సినిమా కాద‌ని, సిద్దార్థ్ సినిమా అని, క‌మ‌ల్ ఎంట్రీ క్లైమాక్స్ లోనే అంటూ వ‌చ్చిన వార్త‌లు క‌మ‌ల్ అభిమానుల్లో నిరాశ నింపాయి. ఈమ‌ధ్య కాలంలో లో – ప్రొఫైల్ తో వ‌స్తున్న భారీ సినిమాగా ‘భార‌తీయుడు 2’ నిలిచింది.

అయితే… మంగ‌ళ‌వారం విడుద‌ల చేసిన ట్రైల‌ర్ ఆ అనుమానాల్ని ప‌టాపంచ‌లు చేసింది. మేకింగ్‌, టేకింగ్‌, విజువ‌ల్ గ్రాండియ‌ర్‌లో శంక‌ర్ మ‌ళ్లీ త‌న మార్క్ చూపించ‌గ‌లిగాడు. ప్ర‌తీ ఫ్రేమ్‌లోనూ కోట్లు క‌నిపించాయి. కమ‌ల్ హాస‌న్ గెట‌ప్పులు కూడా ఆక‌ట్టుకొనేలా ఉన్నాయి. మొత్తానికి మ‌రోసారి శంక‌ర్ త‌న మ్యాజిక్ చూపించ‌బోతున్న సంకేతాలు క‌నిపించాయి. దాంతో.. మ‌ళ్లీ ‘భార‌తీయుడు 2’పై ఆశ‌లు చిగురించాయి. ఈ హైప్‌.. ఈ సినిమాకు అత్య‌వ‌స‌రం. ఎందుకంటే క‌మ‌ల్ కెరీర్‌లోనే భారీ బ‌డ్జెట్ తో రూపొందిన సినిమా ఇది. ఈమాత్రం హైప్ లేక‌పోతే – ఓపెనింగ్స్‌పై ప్ర‌భావం చూపిస్తుంది. ఈ సినిమా కాస్త అటూ ఇటూ అయితే రాబోయే ‘గేమ్ ఛేంజ‌ర్‌’పై కూడా ఆ ఎఫెక్ట్ ఉంటుంది. ‘గేమ్ ఛేంజ‌ర్‌’పై స‌న్న‌గిల్లుతున్న న‌మ్మ‌కాన్ని నిల‌బెట్టాల్సిన బాధ్య‌త ‘భార‌తీయుడు 2’పై కూడా ఎంతో కొంత ఉంది. ఆ విష‌యంలో ఈ ట్రైల‌ర్ స‌క్సెస్ అయ్యిందనే చెప్పొచ్చు. త‌మిళ నాట మాత్రం ‘భార‌తీయుడు 2’ ట్రైల‌ర్ చూసి శంక‌ర్ అభిమానులు ఫుల్ జోష్ తెచ్చుకొన్నారు. ప‌నిలో ప‌నిగా చ‌ర‌ణ్ ఫ్యాన్స్ ఖుషీ అవుతున్నారు. శంక‌ర్ త‌మ హీరోకు మంచి సినిమానే ఇస్తాడ‌న్న న‌మ్మ‌కం ఇప్పుడు కాస్త కాస్త క‌లుగుతోంది.