ఆంధ్రప్రదేశ్ ముఖ్యమంత్రి చంద్రబాబు నాయుడుకి ఊహించని ఒక అరుదయిన గౌరవం `దక్కింది. అమెరికా ఇల్లినాయిస్‌ రాష్ట్రంలోని షికాగో విశ్వవిద్యాలయం ఆయనకు గౌరవ డాక్టరేట్ ప్రకటించింది. ఆంధ్రప్రదేశ్ రాష్ట్రాభివృద్ధికి ఆయన చేస్తున్న కృషికి గుర్తింపుగా డాక్టరేట్ ఇస్తున్నట్లు ప్రకటించింది. దానిపై చంద్రబాబు నాయుడు స్పందిస్తూ తనకు విశ్వవిద్యాలయాలు ఇచ్చే డాక్టరేట్ ల కంటే ప్రజల హృదయాలలో చిరస్థాయిగా స్థానం సంపాదించుకోవడానికే ఎక్కువ ఇష్టపడుతున్నానని అన్నారు. ఇంతకు ముందు కూడా దేశ విదేశాలలోని అనేక విశ్వవిద్యాలయాలు తనకు గౌరవ డాక్టరేట్ ఇచ్చేందుకు సిద్దపడినా తాను వాటిని సున్నితంగా తిరస్కరించానని తెలిపారు. కానీ షికాగో విశ్వవిద్యాలయం అందిస్తున్న ఈ డాక్టరేట్ చాలా ప్రతిష్టాత్మకమయినది కనుకనే అంగీకరిస్తున్నానని తెలిపారు. దానిని స్వీకరించడం వలన అమెరికాలో స్థిరపడిన ప్రవాసాంధ్రులతో సంబంధాలు మరింత బలపడతాయనే కారణం చేత కూడా ఈ డాక్టరేట్ స్వీకరించడానికి అంగీకరించానని చంద్రబాబు నాయుడు తెలిపారు.