‘బింబిసార‌’తో ద‌ర్శ‌కుడిగా తన మార్క్ చూపించుకొన్నాడు వ‌శిష్ట‌. ఆ వెంట‌నే… చిరంజీవితో ‘విశ్వంభ‌ర’ ప‌ట్టాలెక్కించాడు. ప్రాజెక్ట్ ప‌రంగా క్రేజీ సినిమానే ఇది. సంక్రాంతికి రావాలి. కానీ ఆల‌స్య‌మైంది. ‘విశ్వంభ‌ర‌’ త‌ర‌వాత చిరంజీవి ప్రాజెక్ట్ ఏమిట‌న్న విష‌యంలో క్లారిటీ వ‌చ్చింది. కానీ వ‌శిష్ట సినిమా ఎవ‌రితో అనే విష‌యంలో త‌ర్జ‌న భ‌ర్జ‌న‌లు జ‌రుగుతున్నాయి.

నిజానికి ‘బింబిసార‌’ త‌ర‌వాత రామ్ చ‌ర‌ణ్ నుంచి వ‌శిష్ట‌కు పిలుపు వ‌చ్చింది. చ‌ర‌ణ్ కోసం ఓ క‌థ రెడీ చేశాడు వశిష్ట‌. అది చిరంజీవితో పాటు చ‌ర‌ణ్‌కి కూడా బాగా న‌చ్చింది. అయితే చ‌ర‌ణ్ బిజీ షెడ్యూల్స్ దృష్ట్యా.. వ‌శిష్ట‌కు వెంట‌నే డేట్లు ఇవ్వ‌లేక‌పోయాడు. అదే స‌మ‌యంలో ‘నాకు స‌రిప‌డ క‌థ ఉందా’ అని చిరంజీవి అడ‌గ‌డం, అప్పుడే ‘విశ్వంభ‌ర‌’ క‌థ చెప్ప‌డం, అది చిరుకి న‌చ్చ‌డం జ‌రిగిపోయాయి. ‘విశ్వంభ‌ర‌’ త‌ర‌వాత చ‌ర‌ణ్‌తో సినిమా ఉంటుంద‌న్న ఫీలింగ్ లో ఉన్నాడు వ‌శిష్ట‌. అయితే ఇప్పుడు చ‌ర‌ణ్ ఫుల్ బిజీ. త‌న 16, 17వ సినిమాలు లాక్ అయిపోయాయి. ఆ త‌ర‌వాత చ‌ర‌ణ్ దొరుకుతాడా, లేదా? అనేది అనుమానం. సో.. ఇప్పుడు వ‌శిష్ట మ‌రో హీరోని వెదికి ప‌ట్టుకోవాలి. ప్ర‌స్తుతం వ‌శిష్ట దృష్టి క‌ల్యాణ్ రామ్ పై ఉంద‌ని స‌మాచారం. ఇటీవ‌ల క‌ల్యాణ్ రామ్ తో వ‌శిష్ట భేటీ వేశారు. వీరిద్ద‌రూ క‌థ‌ల గురించి చ‌ర్చించుకొన్న‌ట్టు తెలుస్తోంది. నిజానికి `బింబిసార 2` ఈ కాంబోలో రావాలి. కానీ రాలేదు. ఆ ప్లేస్ లో మ‌రో ప్రాజెక్టు ప‌ట్టాలెక్కే అవ‌కాశాలు క‌నిపిస్తున్నాయి.