మెగా ఆల్బ‌మ్ ఖైదీ నెం.150 నుంచి మ‌రో పాట వ‌చ్చేసింది. అమ్మ‌డు కుమ్ముడు, సుంద‌రి పాట‌లు ఇప్ప‌టికే యూ ట్యూబ్‌లో హ‌ల్ చ‌ల్ చేస్తున్నాయి. ఇప్పుడు వాటికి యూ అండ్ మీ పాట తోడైంది. హ‌రిహ‌ర‌న్‌, శ్రేయా ఘోష‌ల్ క‌ల‌సి పాడిన ఈ పాట‌కి జానీ మాస్ట‌ర్ నృత్య రీతులు స‌మ‌కూర్చారు. ఇదో మెగా మెలోడీ. శ్రీ‌మ‌ణి రాసిన ప‌దాల్లో పొయెట్రీ బాగానే దొర్లింది. ‘సాగ‌ర స‌మ‌యాన సాగ‌ర తీరాన సంధ్యా సూర్యుడిలా నువ్వూ నేనూ’ అంటూ సాగిన ఈ పాట మెలోడీ ల‌వ‌ర్స్‌కి న‌చ్చేలానే ఉంది. ‘పువ్వుల వ‌ర‌దంటే అచ్చం నువ్వేనా న‌న్నే చుట్టేస్తే నువ్వూ నేనా’ అంటూ ప‌దాలు వ‌ర‌ద‌లై పారాయి.
పాడుకోవ‌డానికి హాయిగానే ఉంది పాట. ఇప్ప‌టి వ‌ర‌కూ వ‌చ్చిన రెండు పాట‌లూ మాస్‌కి న‌చ్చి.. ఇది క్లాస్ కోసం తీర్చిదిద్దిన‌ట్టుంది. కాక‌పోతే ఒక్క‌టే ఇబ్బంది. అర‌వై ఏళ్ల వ‌య‌సులో కుర్రాళ్లు పాడుకోవాల్సిన పాట‌లో చిరు క‌నిపించ‌డం ఏంటా.. అని! ఇదేదో యూత్ ఫుల్ స్టోరీ అయితే ఈ పాట‌కు ఓ కుర్ర జంట క‌నిపిస్తే.. బాగుండేదేమో. అయినా మెగా ఫ్యాన్స్‌కి చిరు ఇంకా కుర్రాడేగా. దానికి తోడు కాస్ట్యూమ్స్‌, మేకప్‌ల‌తో ప‌దేళ్లు వెన‌క్కి వెళ్లిపోయాడు. స్టెప్పులూ అద‌ర‌గొట్టేసిన‌ట్టే క‌నిపిస్తోంది. ఇవ‌న్నీ… వ‌య‌సుని క‌వ‌ర్ చేసేస్తాయేమో చూడాలి. అమ్మ‌డు కుమ్ముడు కంటే సుంద‌రి బాగుంద‌నిపించింది. ఇప్పుడు నువ్వూ నేనూ ఆ రెండు పాట‌ల్నీ బీట్ చేసేసిన‌ట్టే అనిపిస్తోంది. ఈనెల 31న ఆడియో నేరుగా మార్కెట్‌లోకి విడుద‌ల చేస్తున్నారు. ఈలోగా ఇంకా ఇలానే పాట‌లు వ‌ద‌లుతారా? లేదంటే ఏకంగా 31న అన్ని పాట‌లూ వినేయొచ్చా? మెగా ఆలోచ‌న‌లు ఎలా ఉన్నాయో ఏంటో??
