చిరంజీవి డాన్సులు చూసే.. ఈ స్థాయి వ‌చ్చా.. అంటుంటాడు సునీల్. ఇప్పుడు ఆ చిరు నే సునీల్ డాన్సుల‌కు కాంప్లిమెంట్ ఇచ్చిన సంద‌ర్భం ఇది. డాన్సుల్లో సునీల్ త‌న‌దైన శైలి చూపిస్తుంటాడు. ఇప్పుడు ఆస్టైల్ చిరంజీవికీ న‌చ్చేసింది. అందుకే ‘మ‌న‌కున్న మంచి డాన్స‌ర్ల‌లో సునీల్ ఒక‌డు’ అంటూ కాంప్లిమెంట్ ఇచ్చేశాడు చిరు. సునీల్ క‌థానాయ‌కుడిగా న‌టించిన జ‌క్క‌న్న ఆడియో ఫంక్ష‌న్ కొద్దిసేప‌టి క్రితం హైద‌రాబాద్ లోని శిల్ప‌క‌ళావేదిక‌లో జ‌రిగింది. ఈ కార్య‌క్ర‌మానికి చిరు ముఖ్య అతిథిగా విచ్చేశాడు. త‌న స్పీచ్‌లో సునీల్ ని ప్ర‌సంశ‌ల‌తో ముంచెత్తాడు.
”నా అభిమాని అభివృద్దిలోకి వ‌స్తే త‌ల్లి దండ్రుల త‌ర‌వాత గ‌ర్వించే వ్య‌క్తి నేనే. అభిమానులు కూడా వాళ్ల లైఫ్‌కీ సార్థ‌క‌త ఏర్ప‌ర‌చుకోవాలి. వాళ్లూ అభివృద్దిలోకి రావాలి. అలాంటి అభిమానుల్ని చూసి గ‌ర్వ‌ప‌డుతుంటా. అలాంటి వాళ్ల‌లో నెంబ‌ర్ వ‌న్‌.. సునీల్. ఎంతో మందికి సునీల్ స్ఫూర్తినిచ్చాడు. సినిమాపై ప్రేమ, క‌సి ఉంటే.. క‌ష్టాన్ని న‌మ్ముకొంటే త‌ప్ప‌కుండా నిల‌బ‌డ‌తారు అన‌డంలో సునీల్ పెద్ద ఉదాహ‌ర‌ణ. ఈమ‌ధ్య కాలంలో త‌న‌కు తానుగా ఎలా ఫిజిక‌ల్‌గా ఎలా మార్చుకొన్నాడో చూస్తుంటే ఆశ్చ‌ర్యంగా అనిపిస్తుంది. ఇది వ‌ర‌కు చాలా పుష్టిగా ఉండేవాడు. త‌ర‌వాత బాడీ బిల్డ‌ర్ గా మారాడు. మాన‌వ సాధ్య‌మా అనిపిస్తుంది. క‌ష్ట‌ప‌డితే సాధించ‌లేనిది ఏదీ లేదు.. అని నిరూపించడానికి బెస్ట్ ఎగ్జాంపుల్‌.. మ‌న‌కున్న బెస్ట్ డాన్స‌ర్ల‌లో సునీల్ ఒక‌డు. ఈ కార్య‌క్ర‌మానికి కేవ‌లం సునీల్ కోస‌మే వ‌చ్చా. తాను నాపై చూపించే ఆప్యాయ‌త అలాంటిది” అంటూ సునీల్‌పై త‌న‌కున్న అభిమానం బ‌య‌ట‌పెట్టాడు చిరు.
