ఏపీ అసెంబ్లీ ఎన్నిక‌ల్లో అపూర్వ విజ‌యం సాధించిన పవన్ క‌ల్యాణ్‌, తొలిసారి చిరంజీవిని క‌లుసుకొన్నారు. ఢిల్లీ నుంచి హైదరాబాద్ వ‌చ్చిన పవన్ నేరుగా చిరంజీవి ఇంటికి వెళ్లారు. పవన్ ని చిరు కుటుంబం పూల వ‌ర్షంతో ఆహ్వానం ప‌లికింది. పవన్ ని చూడ‌గానే అంద‌రి క‌ళ్ల‌ల్లో ఆనందం, క‌న్నీటి భాష్షాలు. ఆ మూమెంట్ ని మాట‌ల్లో వ‌ర్ణించ‌లేం. చిరు రాగానే పవన్ పాదాభివందనం చేయ‌డం, ఆ త‌ర‌వాత చిరు త‌మ్ముడ్ని ఆత్మీయంగా ఆలింగ‌నం చేసుకోవ‌డం – మెగా అభిమానుల‌కు క‌న్నుల పండుగ‌లా క‌నిపించిన దృశ్యం. అమ్మ, వ‌దిన‌ల కాళ్ల‌కు సైతం దండం పెట్టి, వాళ్ల ఆశీర్వ‌చ‌నాలు అందుకొన్నారు పవన్. వ‌దిన అంటే ప‌వ‌న్‌కు చాలా అభిమానం. వాళ్లిద్ద‌రిదీ ప్ర‌త్యేక‌మైన అనుబంధం. అది ఈ సంద‌ర్భంలో మ‌రింత అందంగా సాక్షాత్క‌రించింది. ప‌వ‌న్‌ని గ‌జ‌మాల‌తో స‌త్క‌రించారు చిరు. అనంత‌రం కేక్ కూడా క‌ట్ చేశారు. ఈ వీడియో ఇప్పుడు సోష‌ల్ మీడియా మాధ్య‌మాల్లో వైర‌ల్ గా మారింది. పవన్ తో పాటుగా భార్య అన్నా, త‌న‌యుడు అకీరా కూడా ఉన్నారు. ఈనెల 12న చంద్ర‌బాబు నాయుడు ప్ర‌మాణ స్వీకారం చేసే అవ‌కాశం ఉంది. ఈ వేడుక‌కు చిరు కూడా హాజ‌ర‌య్యే సూచ‌న‌లు కనిపిస్తున్నాయి.
చిరు ఇంటికి పవన్… మెగా సంబ‌రాలు
