చిరంజీవి కొత్త లుక్ టాలీవుడ్ లో చ‌ర్చ‌నీయాంశంగా మారింది. ఎప్పుడూ లేనిది చిరు గుండు ఎందుకు చేయించుకున్నారు? అన్న‌ది అంద‌రిలోనూ మెదులుతున్న ప్ర‌శ్న‌. ఈ లుక్ కొత్త పాత్ర కోస‌మే అంటూ.. చిరు పీఆర్ స్ప‌ష్టం చేసింది. అది.. మెహ‌ర్ ర‌మేష్ సినిమా కోస‌మా? బాబి సినిమా కోసమా? వినాయ‌క్ సినిమా కోస‌మా? అంటూ.. ఆరాలు తీయ‌డం మొద‌లెట్టారు మెగా అభిమానులు.

అయితే.. ఈ గుండు వెనుక‌.. అల్లు అర‌వింద్ ఉన్నార‌న్న‌ది ఇన్‌సైడ్ వ‌ర్గాల టాక్‌. `ఆహా` కోసం చిరుతో ఓ వెబ్ సిరీస్ చేయించాల‌ని అర‌వింద్ ప్లాన్ చేస్తున్నారు. ఇప్ప‌టికే చిరు కోసం కొన్ని స్క్రిప్టులు సిద్ధం చేశారు. ఇటీవ‌ల బెంగ‌ళూరు వెళ్లిన చిరు, ఖాళీ స‌మ‌యంలో కొన్ని క‌థ‌ల్ని విన్నారని స‌మాచారం. అక్క‌డే.. గెట‌ప్పులూ ట్రై చేశార్ట‌. ఆ గెట‌ప్పుల్లో ఈ గుండు ఒక‌ట‌ని తెలుస్తోంది. `ఆహా` కోసం చిరు ఓ వెబ్ సిరీస్ చేస్తార‌ని ముందు నుంచీ ప్ర‌చారం సాగుతోంది. ఈ విష‌యాన్ని అర‌వింద్ కూడా ధృవీక‌రించారు. చిరు ఎలాంటి ప్ర‌యోగాలు చేయాల‌న్నా.. అది ఇప్పుడున్న ప‌రిస్థితుల్లో వెబ్ సిరీస్ తోనే సాధ్యం. చిరు కూడా.. త‌న సత్తాని ప‌రీక్ష పెట్టి, త‌న‌ని కొత్త గా చూపించే క‌థ‌ల కోసం వెదుకుతున్నారు. `లూసీఫ‌ర్‌`, `వేదాళం` రీమేకులు చిరు చేతుల్లో ఉన్నాయి. ఈ రెండింటిలోనూ గుండుతో సంబంధం లేని పాత్ర‌లే. కాబ‌ట్టి…. చిరు ప్ర‌యోగం వెబ్ సిరీస్‌కోస‌మే అయ్యే ఛాన్సులు ఉన్నాయి.