ఫించన్ రావడం లేదని నిలదీసిన ఉపాధి కూలీ మహిళ చెంప చెల్లుమనిపించారు నిజామాబాద్ కాంగ్రెస్ ఎంపీ అభ్యర్థి జీవన్ రెడ్డి. శుక్రవారం నిజామాబాద్ జిల్లా గోవింద్ పేట్ , చేపూర్, పిప్రి గ్రామాల్లో ప్రచారం చేస్తుండగా ఈ ఘటన చోటుచేసుకుంది.
శుక్రవారం కాంగ్రెస్ నేత వినయ్ రెడ్డితో కలిసి జీవన్ రెడ్డి పలు గ్రామాల్లో పర్యటించారు. ఈ సందర్భంగా ఉపాధి కూలీలు పని చేస్తున్న చోటకు వెళ్లి వారు కాంగ్రెస్ కు ఓటేసి గెలిపించాలని కోరారు. అంతలోనే జీవన్ రెడ్డి వద్దకి వచ్చిన ఓ ఉపాధి కూలీ మహిళా కాంగ్రెస్ నేతలకు షాక్ ఇచ్చారు.
అసెంబ్లీ ఎన్నికల్లో కాంగ్రెస్ కు ఓటు వేశానని,అయినా తనకు మాత్రం ఫించన్ రావడం లేదని మోరపెట్టుకుంది. ఓటు ఎవరికీ వేశావని జీవన్ రెడ్డి ప్రశ్నించగా మీకే వేశానని సమాధానమివ్వగా ఆర్మూర్ లో వినయ్ రెడ్డి గెలవలేదని, అన్యాయం జరిగిందన్నారు జీవన్ రెడ్డి. శాంతించని మహిళా తనకు ఫించన్ రావడం లేదనడంతో ఆమె చెంప చెల్లుమనిపించారు జీవన్ రెడ్డి.
ఆ సంభాషణను అక్కడే ఉన్న కొంతమంది వీడియో తీయడంతో క్షణాల్లో ఈ వీడియో సోషల్ మీడియాలో వైరల్ గా మారింది. కాంగ్రెస్ అభ్యర్థి ఓటమి భయంతో ప్రశ్నించిన వారిపై చేయి చేసుకుంటున్నారని బీఆర్ఎస్ నేతలు కామెంట్స్ చేస్తున్నారు. కాకపోతే, మహిళను చెంపపై జీవన్ రెడ్డి సరదాగానే కొట్టినట్లుగా వీడియోలో స్పష్టంగా కనిపిస్తోందని కాంగ్రెస్ నేతలు చెప్తున్నారు.
