తెలంగాణ రాష్ట్ర సమితి ప్రభుత్వంపై, ముఖ్యమంత్రి కల్వకుంట్ల చంద్రశేఖర రావు తీసుకుంటున్న ప్రజా వ్యతిరేక నిర్ణయాలపై కాంగ్రెస్ పార్టీ సీనియర్ నాయకుడు, ఎంపీ రేవంత్ రెడ్డి ఒక్కడే ఉద్యమం చేస్తారా..? తెలంగాణలో ఉన్న మిగిలిన కాంగ్రెస్ నాయకులు ఎవరు ఆయనకు కలిసి రారా..? పదవుల కోసం పైరవీలు చేయడం తప్ప.. ప్రభుత్వ నిర్ణయాలకు వ్యతిరేకంగా పోరాటం చేయరా..? ఇవన్ని కాంగ్రెస్ అధిష్టానం తెలంగాణ కాంగ్రెస్ పార్టీ సీనియర్ నాయకులను అడుగుతున్న ప్రశ్నలు. తెలంగాణలో రెండోసారి కాంగ్రెస్ పార్టీ ఓటమి పాలు కావడం, పార్టీ నుంచి గెలిచిన వారిని కూడా అధికార తెలంగాణ రాష్ట్ర సమితి విలీనం చేసుకోవడం వంటివి జరిగినా తెలంగాణ కాంగ్రెస్ నాయకులు మాత్రం పైపై ప్రకటనలకే పరిమితం అవుతున్నారని, కేసీఆర్ ప్రభుత్వం పై నిర్దిష్టమైన ఉద్యమం చేయటం లేదంటూ అధిష్టానం కాంగ్రెస్ నాయకులపై మండిపడుతోంది. పీసీసీ అధ్యక్ష పదవి నాకు ఇవ్వండి అని కొందరు, ఫలానా వారికి ఇవ్వండి అంటూ మరికొందరు పైరవీలు చేస్తున్నారే తప్ప ప్రభుత్వ నిర్ణయాలపై ఎలాంటి ఉద్యమం చేయడం లేదంటూ పార్టీ సుప్రీం సోనియాగాంధీ తెలంగాణ నాయకుల వద్ద మండిపడినట్లు సమాచారం.
ప్రజా వ్యతిరేక నిర్ణయాలపై ఉద్యమం చేయకపోవడం మాట దేవుడెరుగు.. ఆ పని చేస్తున్న రేవంత్ రెడ్డికి కూడా ఎవరూ సహకరించడం లేదంటూ తీవ్రస్థాయిలో మండిపడినట్లు చెబుతున్నారు. పార్టీ సీనియర్ నాయకులు ఇలాగే ఉంటే వచ్చే ఎన్నికలలోనే కాదు మరో 50 సంవత్సరాల వరకు తెలంగాణలో అధికారంలోకి వచ్చే అవకాశం ఉండదని హెచ్చరించినట్టు సమాచారం. గ్రూపుల గొడవలే పార్టీని నాశనం చేస్తున్నాయి అనే వాస్తవం తెలుసుకోవాలని, వీటికి పుల్ స్టాప్ పెట్టి పార్టీ కోసం పని చేయండి అని సోనియా గాంధీ హితవు పలికినట్లు సమాచారం.
