సినిమా హాళ్లలో జాతీయ గీతం ప్రదర్శించడం ఇప్పుడు నిర్బంధంలా మారింది. అలా వెళ్లిన ప్రతి ఒక్కరూ.. కచ్చితంగా జాతీయగీతం సందర్భంగా లేచి నిలబడాలి. ఏ కారణం చేత అయినా నిలబడకపోతే.. అతి పక్కన నోటి దురద .. లేకపోతే చేతి దురద ఉన్న వారికి అలుసుగా మారిపోతోంది. తిట్టడమో.. దాడిచేయడమో.. తమ జన్మహక్కు అన్నట్లుగా రెచ్చిపోతున్నారు. వారికి ఎందుకింత స్వేచ్ఛ వచ్చింది..? జాతీయ గీతం వచ్చేటప్పుడు లేచి నిలబడకపోతే దేశభక్తి లేనట్లేనా..?

దేశభక్తికి కొలమానం సినిమా ధియేటర్లలో ఉందా..?

కార్తీక్ ప్రసాద్‌పై అనే వ్యక్తిపై గురువారం పోలీసులు కేసు నమోదు చేశారు. అసలు కేసేమిటంటే.. ఓ మల్టిప్లెక్స్‌లో సినిమా చూసేందుకు వెళ్లిన కార్తీక్ ప్రసాద్ స్మార్ట్ ఫోన్ చూసుకుంటూ కూర్చున్నాడు. ఆ సమయంలో జాతీయ గీతం వచ్చింది. లేచి నిలబడలేదు. దాంతో.. ఆయనకు దేశభక్తి తక్కువయిందని.. పక్కనునన మరో అపర దేశభక్తుడు.. దాడి చేసినంత పని చేసి దుర్భాషలాడారు. ఇద్దరి మధ్య అది గొడవకు దారి తీసింది. చివరికి అది కేసయింది.

సుప్రీంకోర్టు వద్దని చెప్పినా సినీ ప్రేక్షకులను ఎందుకు వదలడం లేదు..?

అసలు సినిమా ప్రారంభానికి ముందు జాతీయ గీతం ప్రదర్శించడం అనేది తప్పనిసరి కాదు. అది ధియేటర్ల ఇష్టం. అలాగే.. జాతీయ గీతం వస్తున్నప్పుడు ప్రేక్షకులు లేచి నిల్చోవాలా లేదా అనేది కూడా వారిష్టమే. వినోదం కోసం జనం సినిమాకు వెళ్తారు. దేశభక్తి పాఠాలు విని.. తమ దేశభక్తిని ప్రదర్శించుకోవడానికి కాదు. ఇదే విషయాన్ని సుప్రీంకోర్టు స్పష్టం చేసింది. జాతీయ జెండా, జాతీయ గీతానికి అవమానం అన్న ప్రశ్నే.. అలాంటి సందర్భాల్లో రాదని తేల్చి చెప్పింది. జాతీయగీతం పాడి తీరాల్సిందేననడానికి ఎలాంటి చట్టపరమైన నిబంధన లేదు, జాతీయ గీతాలాపనపై కేంద్రప్రభుత్వం ఒక అంతర్ మంత్రిత్వ శాఖ కమిటీని ఏర్పాటు చేసింది. 12 మంది కమిటీని 2017 డిసెంబరులో ఏర్పాటు చేశారు. జాతీయ గీతాలాపనకు మార్గదర్శకాలను ఈ కమిటీ సూచించాల్సి ఉంది. రాష్ట్రప్రభుత్వాల సూచనలను ఆహ్వానిస్తూ ఈ కమిటీ లేఖలు పంపింది. ప్రభుత్వాల నుంచి ఇంకా సమాధానం రావాల్సి ఉంది.

జాతీయ గీతం సినిమాహాళ్లలో ప్రదర్శించడం గౌరవాన్ని తగ్గించడమే..!

52 సెకన్ల నిడివి ఉండే జాతీయ గీతాన్ని పూర్తి స్థాయిలో గానీ, పాక్షికంగా గానీ ఆలాపించేందుకు కొన్ని నియమాలున్నాయి. భారత రాష్ట్రపతి పాల్గొనే కార్యక్రమాల్లో ముందుగానూ, చివరిలోనూ జాతీయ గీతం పాడాలి. అప్పుడు అందరూ లేచి నిల్చోవడం ఆనవాయితీగా వస్తోంది. రేడీయోలో రాష్ట్రపతి ప్రసంగం వచ్చినప్పుడు కూడా జాతీయ గీతాన్ని వినిపిస్తారు. ప్రధానమంత్రి ప్రసంగానికి జాతీయ గీతం వర్తించదు. పాఠశాలలు, కార్యాలయాల్లో స్వాతంత్ర్య దినోత్సవం, రిపబ్లిక్ డే సహా కొన్ని ప్రత్యేక కార్యక్రమాల సందర్భంగా జాతీయ గీతం పాడతారు. విదేశీ నేతలు భారత్ వచ్చినప్పుడు ఇరు దేశాల జాతీయ గీతాలు వినిపించడం ఆనవాయితీగా వస్తోంది. అంతే కానీ.. సినిమా ధియేటర్లలో ప్రదర్శించడం… దానికి విధిగా.. ప్రేక్షకులు లేచి నిలబడాలనడం… అలా చేయకపోతే.. దేశద్రోహి అన్నట్లుగా వ్యవహరించడం… ఇప్పుడు కనిపిస్తోంది.

దేశమంటే మట్టి కాదు.. దేశమంటే మనషులు..!

రాజకీయాల్లోకి దేశభక్తి కలసిపోయి.. తాము చెప్పింది చేయకపోతే.. దేశభక్తి లేదన్నట్లుగా.. కొంత మంది రాజకీయం చేస్తున్నారు. దాని వల్ల ప్రజల్లో అసహనం పెరుగుతోంది. దేశమంటే.. మంటి కాదు.. దేశమంటే మనుషులనే సంగతిని గుర్తించలేని.. వీరు… సొంతంగా… మోరల్ పోలీసింగ్ చేస్తూ.. ప్రజల్ని వేధిస్తున్నారు.