`ఏంటీ ! ఇది స్టోరీనా… ?!’ మండిపడ్డాడు. వెంగళప్ప.
`అవును, ఇదే స్టోరీ’ రెట్టించాడు జంబులింగం.
`ఊరికే పేర్లు చెబితేకాదయ్యా, నాకు కథకావాలి. కథ. ఎంత ఖర్చయినా సరే, చిరంజీవి 150వ చిత్రకథలాగా చాలా డెప్త్ గా ఉండాలి, సరిగా చెప్పు…’ రెట్టించాడు వెంగళప్ప.
`సరే, స్టోరీ లైన్ పొడిగిస్తే … ఇక్కడో ట్విస్ట్ – మర్డర్ ‘
`అహ్హాహ్హా… మర్డర్… ఇది బాగుందయ్యా, చెప్పు స్టోరీ.. ‘
`ఇంద్రాణికి పెళ్లయింది. అలాగే పీటర్ కీ పెళ్ళయింది. అలాగే.. వీళ్లిద్దరీ పెళ్లయింది ‘
`ఎహే, ఇంద్రాణికి పెళ్లయిందన్నావ్, పీటర్ కి పెళ్లయిందన్నావ్. మళ్ళీ వీళ్లిద్దరికీ పెళ్లేంటవేంటయ్యా.. ‘ తలగోక్కున్నాడు వెంగళప్పు.
`మరీ నా కథలో అదే ఇంటరెస్టింగ్. చిరంజీవి తన 150 చిత్రానికి ఈ కథ తీసుకుంటానంటూ తెగ ఇంటరెస్ట్ చూపిస్తున్నాడు. నీకు నచ్చితే చెప్పు, లేకపోతే చిరంజీవి తీసేసుకుంటాడు ‘ అన్నాడు సినీస్టోరీ రైటర్ జంబులింగం.
`వద్దు, వద్దు నేనే తీసుకుంటాను. కథ చెప్పు ‘ బ్రతిమిలాడాడు వెంగళప్ప.
`ఇద్దరికీ గతంలో పెళ్లయింది. ఇద్దరిదీ సెకండ్ మేరేజ్ అన్నమాట. ఇక, షీనా మంచి అందగత్తె ? ఇప్పుడు రాహుల్ ఎంటరవుతాడు ‘
`మధ్యలో రాహుల్ ఎక్కడినుంచి వచ్చాడు. జమ్మూలో పరామర్శకు వెళ్ళాడుకదా…’ తనకూ కరెంట్ టాపిక్స్ బాగా తెలుసన్నట్టు అదోలా ఫోజిచ్చి అన్నాడు వెంగళప్ప.
`ఆ రాహుల్ కాదెహె… మన స్టోరీలో రాహుల్ కుడా అందగాడు. అతను షీనాను చూశాడు. ప్రేమలో పడ్డాడు ‘
`ఓ లవ్ స్టోరీ అన్నమాట ‘
`కాదు, ఇక్కడో ట్విస్ట్. మధ్యలో మర్డర్ ‘
`ఎంటీ, మర్డరా… !’ఎగిరిగంతేశాడు వెంగళప్ప. అంటే, ఇది క్రైమ్ స్టోరీనా?
`క్రైముంది. కానీ మధ్యలో సెంటిమెంటల్ ట్విస్ట్ ‘
`అదేంటీ ? ‘
`మొత్తం కథంతా ఊరికే చెప్పేస్తానా ఏంటీ, తీయ్ అడ్వాన్స్ గా ఓ 50వేలు ఇచ్చుకో. కథ నచ్చితే తర్వాత ఎమౌంట్ ఇచ్చేద్దువుగానీ, అవతల చిరంజీవి…’
`వద్దు, చిరంజీవికి ఇవ్వొద్దు. నేనే తీసుకుంటాను. ఇందా 50వేలు. కథ చెప్పు. ఏంటీ ఆ సెంటిమెంటల్ ట్విస్ట్ ? ‘ అమాయకంగా అడిగాడు వెంగళప్ప.
`కథలో అప్పుడు, ముకెర్జీయా… ‘
`ఈయనెవరూ…!? ‘
`మరదే, ఊరికే తొందరపడకయ్యా, నా కథలో ఎన్నో ట్విస్ట్ లూ, మరెన్నో సెంటిమెంట్సూనూ… పీటర్ గురించి చెప్పానుకదా, అతని పూర్తిపేరు పీటర్ ముకెర్జీయా అన్నమాట.. ‘
`ఓహా…! ‘
`పీటర్ ముకెర్జీయాకు ఇంద్రాణితో పెళ్ళికావడానికి ముందే మరొకామెతో పెళ్లియిందని చెప్పానుకదా. వీరిద్దరికి పుట్టినవాడు రాహుల్. ఈ రాహుల్, షీనాను ప్రేమించాడు. షీనా కూడా ప్రేమలో పడింది ‘
`సూపర్. ఇక చాలు నాకంతా అర్థమైంది. లవ్ సాంగ్ వేసుకోవచ్చు ‘
`ఇక్కడో ట్విస్ట్ ‘
`మళ్ళీ ట్విస్టా…? చెప్పుచెప్పు… ‘
`ఇంద్రాణి తన భర్త పీటర్ ముకెర్జీయాకు షీనాను పరిచయం చేస్తూ ఆమె తన చెల్లెలని అని చెప్పింది’
`ఎట్టా ! అంటే రాహుల్ కు షీనా వరసకు… ‘
`అప్పుడే ఆశ్చర్యపోకు, మరో ట్విస్ట్ ‘
`ఇంకో ట్విస్టా !? ‘
`మరి అదే ఈ జంబులింగం కథ చెప్పాడంటే ట్విస్ట్ లమీద ట్విస్టులే… ఆఁ.. సరిగా అప్పుడు షీనా హత్యకు గురవుతుంది. ఆమె శవాన్ని ముక్కలుముక్కలుగా కోసి ఒక అడవి ప్రాంతంలో పాతరపెట్టేస్తారు’
`అమ్మో…అంటే దెయ్యం ఎంటరవుతుందా !? ‘
`కథలో దెయ్యంలేదు. షీనాను చంపింది ఎవరో తెలుసా ? ‘
`ఎవరూ… ??? ‘
`ఇంద్రాణి ‘
`ఎంటీ !! సొంత చెల్లెల్ని చంపేసిందా ? అమ్మో, ఈ ట్విస్ట్ మరీ ఇంటరెస్టింగాఉందే… ‘
`ఇంద్రాణికి షీనా చెల్లెలు కాదు ‘
`చెల్లెలు కాదా ! ఇందాక ఇంద్రాణి తన భర్త పీటర్ కు షీనాను పరిచయం చేస్తూ చెల్లెలని చెప్పిందన్నావుగా…!? ‘
`అన్నాను. కానీ ఇక్కడ మరో ట్విస్ట్. అందుకే మార్చేస్తున్నాను ‘
`ఎంటీ, ట్విస్ట్ కోసం వరసలు మార్చేస్తావా… సరే, చెప్పు.. ‘
`షీనా, రాహుల్ ప్రేమించుకున్నారు. ఈ సంబంధం ఇంద్రాణికి నచ్చలేదు. అంతే, హత్యచేసి శవాన్ని కారు డ్రైవర్ సాయంతో ముక్కలుముక్కలుగా కోసేసి కారడవిలో పాతరపెట్టేసింది ‘
`అమ్మో, ఎంత రాక్షసి ‘
`పోలీసులు ఎంటరవుతారు. కేస్ ఇన్వెస్టిగేషన్ జరుగుతుంటుంది. కారు డ్రైవర్ అనుమానాస్పద ప్రవర్తనతో తీగలాగితే డొంకంతా కదులుతుంది. చివరకు ఇంద్రాణి తానే ఈ హత్యచేశానని ఒప్పుకుంటుంది. మళ్ళీ ఇక్కడో ట్విస్ట్.. ‘
`ఓర్నాయనో, ఇన్ని ట్విస్టులా.. సూపర్ కథ. కలెక్షన్స్ లో బాహుబలిని మించిపోవడం ఖాయం…చెప్పుచెప్పు…’ ఉత్సాహంతో ఊగిపోయాడు వెంగళప్ప.
`షీనా తన చెల్లెలు కాదనీ, ఆమె తన కూతురని ఇంద్రాణి పోలీసుకు చెప్పింది. గతంలో తాను తప్పు చెప్పానని కూడా అంగీకరిస్తుంది. తన కూతురు షీనా, రాహుల్ సంబంధం పెట్టుకోవడం నచ్చకే హత్యచేశానని చెబుతుంది’
`అవునూ, షీనా వరుసకు రాహుల్ కు…ఛీ..ఛీఛీ.. ‘
`ఇప్పుడు ఎంటర్ అవుతాడు… మిఖేల్ బోరా’
అప్పటికే కథలోని ట్విస్ట్ లు భరించలేని వెంగళప్ప అసహనంతో…
`మధ్యలో వీడెవడయ్యా….!!??’ తలపట్టుకున్నాడు.
`ఇతను షీనాకు సోదరుడు’
అప్పటికే వెంగళప్ప, నేలమీద పడి గిలగిలా కొట్టుకుంటున్నాడు.
`ఇది స్టోరీనా…ఇక చెప్పకు వినలేను. హ్హీహ్హీహ్హీ… ఒక ఇంద్రాణి…ఒక పీటర్… ఒక షీనా…మధ్యలో రాహుల్… హ్హీహ్హీహ్హీ…ట్విస్ట్, ట్విస్ట్ మీద ట్విస్ట్.. బిగ్ ట్విస్ట్ మీద మరో బిగ్ ట్విస్ట్….ఓర్నాయనో, నేను తట్టుకోలేను. ఇన్ని ట్విస్టుల సినిమాకథ నాకొద్దూ, ఆ చిరంజీవికి ఇచ్చేసుకో..నేను వస్తా…’
– అంటూ వెంగళప్ప వెళ్లిపోతుంటే…
`ఆగు వెంగళప్పా, ఇంకో ట్విస్ట్ మిగిలేఉంది…. మధ్యలో ముఖేష్ అంబానీ..’
ఆ మాటలు వింటూనే వెంగళప్ప నొరెళ్లబెట్టి పరుగోపరుగు.
జంబులింగం నవ్వుకున్నాడు. మరోసారి టివీలో నేషనల్ ఛానెల్స్ ట్యూన్ చేస్తూ పోతున్నాడు. ఇంకా ఇంద్రాణి మర్డర్ కేసు వార్తా కథనాలు వస్తూనే ఉన్నాయి. చేతిలో 50వేలను ప్రేమగాతడిమాడు, నేషనల్ ఛానెల్స్ కి థాంక్స్ చెప్పుకుంటూ…
– కణ్వస
