బండ్ల గ‌ణేష్‌కి క‌రోనా… అనే వార్త టాలీవుడ్ లో క‌ల‌క‌లం రేపుతోంది. `నాకు క‌రోనా ఉంది` అని గ‌ణేష్ ప్ర‌క‌టించ‌లేదు గానీ, మీడియా అంత‌టా ఇదే హాట్ టాపిక్‌. ఇదే నిజ‌మైతే టాలీవుడ్ లో క‌రోనా బారిన ప‌డిన తొలి వ్య‌క్తి గ‌ణేష్ అవుతాడు.

టాలీవుడ్ ఇప్పుడు షూటింగుల కోసం ఎదురు చూస్తోంది. క‌రోనా భ‌యాలు వెంటాడుతున్నా, స్టార్లు సెట్లో అడుగుపెట్ట‌డానికి జంకుతున్నా – ఏదోలా షూటింగు చేసుకోవాల‌ని ద‌ర్శ‌క నిర్మాత‌లు భావిస్తున్నారు. హీరోల్ని ఎలాగోలా ఒప్పించి.. వాళ్ల‌ని సెట్స్‌పైకి తీసుకురావాల‌ని ముమ్మ‌ర ప్ర‌య‌త్నాలు సాగిస్తున్నారు. ఈ ద‌శ‌లో `బండ్ల‌కు క‌రోనా` వార్త‌.. ముంద‌ర కాళ్ల‌కు బంధం వేసేలా మారింది. నిర్మాత‌ల కోస‌మో, త‌మ సినిమాల్ని త్వ‌ర‌గా పూర్తి చేసుకోవాల‌న్న ఆలోచ‌న‌తోనో షూటింగుల‌కు వ‌ద్దామ‌నుకుంటున్న హీరోలు ఇప్పుడు మ‌రింత భ‌య‌ప‌డే ప్ర‌మాదం ఉంది. బండ్ల కి క‌రోనా సినిమాల వ‌ల్ల రాలేదు. సెట్లో అడుగుపెట్ట‌డం వ‌ల్ల రాలేదు. కానీ.. త‌ను సినిమా వాడే. అందుకే… ఇప్పుడు చిత్ర‌సీమ‌లో అంత క‌ల‌క‌లం. ఎన్ని జాగ్ర‌త్త‌లు తీసుకున్నా, క‌రోనా ఏదో ఓ రూపంలో మ‌నిషికి క‌బ‌ళిస్తుంద‌న్న భ‌యాలు సినిమా వాళ్ల‌లో ఎక్కువ అవుతున్నాయి. క‌రోనాకి సెల‌బ్రెటీ – నాన్‌సెల‌బ్రెటీ అనే తేడా లేదు. కాస్త అద‌మ‌ర‌చినా వాలిపోతుంది. సెట్లో ఎన్ని జాగ్ర‌త్త‌లు తీసుకున్నా, క‌రోనాని అట్టుకోవ‌డం క‌ష్ట‌మ‌న్న అభిప్రాయానికి హీరోలు వ‌చ్చేస్తే – ఇక సినిమా షూటింగులు ఎట్టిప‌రిస్థితుల్లోనూ ఊపందుకోవు. ఓర‌కంగా బండ్ల‌కు క‌రోనా అన్న వార్త‌.. టాలీవుడ్ లో డేంజ‌ర్ బెల్స్ మోగించిన‌ట్టే.