జనసేన పార్టీలోకి చేరిక‌ల జోరు పెరుగుతోంది. వైసీపీ నేత‌ల చూపంతా ఇప్పుడు జనసేన పార్టీ వైపే ఉంది. నియోజ‌క‌వ‌ర్గాల్లో ఉన్న ప‌రిస్థితులు, పార్టీలో ఉన్న నేత‌ల‌ను బ‌ట్టి చేరిక‌లు కొన‌సాగుతున్నాయి. చాలా నియోజ‌క‌వ‌ర్గాల్లో జ‌న‌సేన‌లోకి వైసీపీ క్యాడ‌ర్ క్యూ క‌డుతోంది.
వైసీపీకి రాజీనామా చేసిన మాజీ మంత్రి బాలినేని, పొన్నూరు మాజీ ఎమ్మెల్యే కిలారి రోశయ్య, జగ్గయ్యపేట మాజీ ఎమ్మెల్యే సామినేని ఉదయభాను జనసేనలో చేరిక‌కు ముహుర్తం ఫిక్స్ అయ్యింది. ఇప్పటికే వీరు ముగ్గురూ వేర్వేరుగా పవన్ కల్యాణ్ తో సమావేశమయ్యారు. పార్టీలో చేరికపై చర్చించారు.
విజయనగరం జిల్లాకు చెందిన వైసీపీ యూత్ జోనల్ ఇంఛార్జ్ అవనపు విక్రమ్, డా.అవనపు భావన జనసేనలో చేరబోతున్నారు. వైసీపీ రాష్ట్ర కార్యదర్శి, ప్రకాశం జిల్లాకు చెందిన డా.యాదాల అశోక్ బాబు, నాగులుప్పలపాడు జెడ్పీటీసీ డా.యాదాల రత్నభారతి పార్టీలో చేరనున్నారు. విజయవాడ, గుంటూరు, తిరుపతి నగర పాలక సంస్థల నుంచి పలువురు కార్పొరేటర్లు జనసేన గూటికి చేరబోతున్నారు.
వీరంతా ఈనెల 26వ తేదీన మంగ‌ళ‌గిరి పార్టీ ఆఫీసులో డిప్యూటీ సీఎం పవన్ క‌ళ్యాణ్ స‌మ‌క్షంలో పార్టీ కండువా క‌ప్పుకోబోతున్న‌ట్లు తెలుస్తోంది.
