ఈనెల 27న ‘దేవర’ విడుద‌ల‌కు సిద్ధం అవుతోంది. ఇదో పాన్ ఇండియా ప్రాజెక్ట్. ఇప్ప‌టి వ‌ర‌కూ ఎలాంటి ఈవెంట్ నిర్వ‌హించ‌లేదు. అందుకే ఇప్పుడు ట్రైల‌ర్‌తో ప్ర‌మోష‌న్ల‌కు శ్రీ‌కారం చుట్టాల‌ని చిత్ర‌బృందం నిర్ణ‌యించింది. ఈనెల 10న ‘దేవర’ ట్రైలర్ రాబోతోంది. ముంబైలో జ‌రిగే ఓ ప్ర‌మోష‌న‌ల్ ఈవెంట్ లో ట్రైలర్ ఆవిష్క‌రిస్తారు. ఈ కార్య‌క్ర‌మంలో ఎన్టీఆర్ తో పాటు చిత్ర‌బృందం మొత్తం పాల్గొన‌బోతోంది. ఇప్ప‌టి వ‌ర‌కూ ఈ సినిమాలోంచి 3 పాట‌లు బ‌య‌ట‌కు వచ్చాయి. మ‌రో రెండు పాట‌లు రావాల్సివుంది. హైద‌రాబాద్ లో జ‌రిగే ఓ ఈవెంట్ లో చివ‌రి పాట‌ని విడుద‌ల చేసే అవ‌కాశం ఉంది. ఆయుధ పూజ‌కు సంబంధించిన ఓ పాట ఉంది. అది నేరుగా థియేట‌ర్ల‌లోనే వినిపిస్తారు. ‘దావూదీ’ అనే పాట‌ని చిత్ర‌బృందం ఇటీవ‌లే విడుద‌ల చేసింది. అయితే ఈ పాట‌కు సంబంధించిన స‌రైన సెట్యువేష‌న్ క‌థ‌లో దొర‌క‌లేద‌ట. అందుకే ఈ పాట రోలింగ్ టైటిల్స్ లో వేయ‌బోతున్నార‌ని తెలుస్తోంది.
దాదాపు 2 నిమిషాల నిడివి గ‌ల ట్రైలర్ ని ఇది వ‌ర‌కే చిత్ర‌బృందం క‌ట్ చేసి పెట్టింది. ఈ ట్రైల‌ర్‌లో యాక్ష‌న్‌కి పెద్ద పీట వేశార‌ని తెలుస్తోంది. డైలాగులు కూడా ప‌వ‌ర్ ఫుల్ గా వినిపించ‌బోతున్నాయ‌ని స‌మాచారం. విడుద‌ల‌కు ముందే మ‌రో ట్రైలర్ కూడా రాబోతోంద‌ని తెలుస్తోంది. అది ప్రీ రిలీజ్ వేడుక‌లో విడుద‌ల చేసే అవ‌కాశం ఉంది. సైఫ్ అలీఖాన్ ప్ర‌తినాయ‌కుడిగా న‌టించిన ఈ చిత్రానికి అనిరుథ్ సంగీతాన్ని అందించాడు. శ్రీ‌దేవి కుమార్తె జాన్వీ క‌పూర్ క‌థానాయిక‌గా న‌టించింది. ‘దేవర’ని రెండు భాగాలుగా విడుద‌ల చేస్తున్న సంగ‌తి తెలిసిందే.
