సీక్రెట్ ఏజెంట్ క‌థ‌ల‌కు ఇప్పుడు మంచి గిరాకీ ఏర్ప‌డింది. వాటిని హాలీవుడ్ స్థాయిలో తీసి, పాన్ ఇండియాలోనైనా మార్కెట్ చేసుకొందామ‌నుకొంటున్నారు ద‌ర్శ‌క నిర్మాత‌లు. ఈ జాబితాలో మ‌రో సినిమా వ‌చ్చేస్తోంది. అదే డెవిల్‌. క‌ల్యాణ్ రామ్ క‌థానాయ‌కుడిగా న‌టించిన చిత్ర‌మిది. బింబిసార తో మంచి ఫామ్ లోకి వ‌చ్చాడు క‌ల్యాణ్ రామ్. అమిగోస్ అంత‌గా ఆక‌ట్టుకోక‌పోయినా – కొత్త త‌ర‌హా క‌థే. ఇప్పుడు డెవిల్ తో మ‌రోసారి ఓ వైవిధ్య‌మైన ప్ర‌య‌త్నం చేయ‌బోతున్నాడు క‌ల్యాణ్ రామ్. ఈ రోజు క‌ల్యాణ్ రామ్ పుట్టిన రోజు సంద‌ర్భంగా టీజ‌ర్ వ‌దిలారు.

ఏజెంట్ క‌థే అయినా… బ్యాక్ డ్రాప్ కొత్త‌గా ఉంది. బ్రిటీష్ ప్ర‌భుత్వం మ‌న దేశంపై ఆధిప‌త్యం చెలాయిస్తున్న స‌మ‌యంలో ఏజెంట్ గా ప‌ని చేసిన భార‌తీయుడి క‌థ ఇది. కాబ‌ట్టి ఆటోమెటిగ్గా క‌ల‌ర్ మారింది. క‌ల్యాణ్ రామ్ లుక్ స్టైలీష్‌గా ఉంది.

”మ‌న‌సులో ఉన్న భావ‌న ముఖంలో తెలియ‌కూడ‌దు

మెద‌డులో ఉన్న ఆలోచ‌న మాట‌ల్లో బ‌య‌ట‌ప‌డ‌కూడ‌దు..

– అదే గూఢ‌చారికి ఉండాల్సిన ముఖ్య‌మైన ల‌క్ష‌ణం..” అనే డైలాగ్ వినిపించింది. క‌ల్యాణ్ రామ్ క్యారెక్ట‌రైజేష‌న్, లుక్ కూడా దానికి త‌గ్గ‌ట్టుగానే డిజైన్ చేశారు. బ్యాక్ గ్రౌండ్ స్కోర్‌, కెమెరా వ‌ర్క్ రిచ్‌గా ఉన్నాయి. సంయుక్త మీన‌న్ క‌థానాయిక‌గా న‌టించిన ఈ చిత్రానికి న‌వీన్ మేడారం ద‌ర్శ‌కుడు. అభిషేక్ పిక్చ‌ర్స్ నిర్మిస్తోంది.