సౌత్‌లోని టాప్ మ్యూజిక్ డైరెక్ట‌ర్ల‌లో దేవిశ్రీ ప్ర‌సాద్ ఒక‌డు. త‌న‌దైన బాణీల‌తో యువ‌త‌రాన్ని ఆక‌ట్టుకొన్నాడు. స్టార్ హీరోలంద‌రి సినిమాల‌కూ ప‌ని చేశాడు. వాళ్ల విజ‌యంలో కీల‌క పాత్ర పోషించాడు. ఇప్పుడు దేవిశ్రీ ప్ర‌సాద్ సోద‌రుడు సాగ‌ర్ కూడా అన్న దారిలోనే స్వర‌క‌ర్త‌గా మార‌బోతున్నాడు.

సాగ‌ర్‌.. మంచి గాయ‌కుడు. దేవిశ్రీ ప్ర‌సాద్ సంగీతం అందించిన చిత్రాల్లో కొన్ని మంచి పాట‌లు పాడాడు. ఇప్ప‌టికీ పాడుతున్నాడు కూడా. ‘టాపు లేచిపోద్ది’ (ఇద్ద‌ర‌మ్మాయిల‌తో), ‘శైల‌జా.. శైల‌జా’ (నేను శైల‌జ‌), ‘న‌మ్మ‌క త‌ప్ప‌ని నిజ‌మైనా; (బొమ్మ‌రిల్లు) లాంటి సూప‌ర్ హిట్ గీతాలు సాగ‌ర్ ఖాతాలో ఉన్నాయి. సాగ‌ర్‌, దేవిశ్రీ ప్ర‌సాద్ ఇద్ద‌రి గొంతులూ దాదాపుగా ఒకేలా ఉంటాయి. దాంతో ఏ పాట ఎవ‌రు పాడారో చెప్ప‌డం చాలా క‌ష్టం అవుతుంది. ‘రాక్ష‌సుడు’ చిత్రానికి త‌ను సంభాష‌ణ‌ల ర‌చయిత‌గానూ ప‌ని చేశాడు సాగ‌ర్‌. త‌న‌కి ఎప్ప‌టి నుంచో మ్యూజిక్ డైరెక్ష‌న్‌పై గురి ఉంది. ఇది వ‌ర‌కు చాలాసార్లు ఆఫ‌ర్లు వ‌చ్చాయి. కానీ… ఓ మంచి ప్రాజెక్ట్ కోసం ఎదురుచూస్తున్నాడు. ఇన్నాళ్ల‌కు ఓ మంచి సినిమా దొరికింది. ఓ అగ్ర హీరో చిత్రానికి త‌న‌కు మ్యూజిక్ చేసే అవ‌కాశం ద‌క్కింది. ఓ మాస్ ద‌ర్శ‌కుడు ఈ సినిమాకు ప‌ని చేస్తున్నాడు. త్వ‌ర‌లోనే ఈ ప్రాజెక్ట్ కు సంబంధించిన పూర్తి వివ‌రాలు బ‌య‌ట‌కు వ‌స్తాయి.