తెలుగులో ఓ మంచి సినిమా వ‌స్తే చాలు.. రీమేక్ రైట్స్ ని ఎత్తుకెళ్లిపోవ‌డానికి కాచుకుని కూర్చుంటారు బాలీవుడ్ నిర్మాత‌లు. ఈ యేడాది విడుద‌లైన `క్రాక్‌` సినిమా హిందీ రైట్స్ విష‌యంలో బేర‌సారాలు జ‌రుగుతున్నాయి. తాజాగా… విమ‌ర్శ‌కుల ప్ర‌శంస‌లు పొందిన `నాంది` సినిమాపై కూడా వాళ్ల ఫోక‌స్ ప‌డింది. ఇలాంటి క‌థ‌లు.. బాలీవుడ్ లో బాగా వ‌ర్క‌వుట్ అవుతాయి. పైగా వాళ్ల మార్కెట్ కూడా పెద్ద‌ది. మ‌ల్టీప్లెక్స్ వాళ్ల కోసం సినిమా తీసినా… లాభాలు సంపాదించేయొచ్చు.

అయితే.. ఈ సినిమాపై ఏ బాలీవుడ్ నిర్మాత క‌న్నేయ‌క‌ముందే… దిల్ రాజు లాగేసుకున్నారు. `నాంది` సినిమాకి సంబంధించిన అన్ని భాష‌ల రీమేక్ రైట్స్ దిల్ రాజునే ద‌క్కించుకున్నారు. అందుకు గానూ మంచి మొత్త‌మే ఇచ్చిన‌ట్టు స‌మాచారం. ఇటీవ‌ల `నాంది` టీమ్ ని దిల్ రాజు పిల‌పించి మ‌రీ అభినందించారు. అప్పుడే `నాంది` రీమేక్ రైట్స్ గురించిన బేరాలు జ‌రిగిపోయాయ‌ని టాక్‌. `హిట్` సినిమాని బాలీవుడ్ లో రీమేక్ చేస్తున్నారు దిల్ రాజు. ఆ త‌ర‌వాత `నాంది`నీ ఆయ‌న ప‌ట్టాలెక్కించే ఛాన్సుంది. మిగిలిన భాష‌ల మాటేమో గానీ, బాలీవుడ్ లో ఈ సినిమాని దిల్ రాజు నిర్మించ‌డం ప‌క్కా.