ప్ర‌తీ సినిమాతోనూ ఓ ప్ర‌త్యేక అనుబంధం ముడివేసుకోవ‌డం దిల్‌రాజుకి అల‌వాటు. కుటుంబ క‌థా చిత్రాల్లో ఈ సెంటిమెంట్ ఎక్కువ‌గా క‌నిపిస్తుంటుంది. `శ్రీ‌నివాస క‌ల్యాణం` సినిమా కూడా ఆయ‌న మ‌న‌సుకు చాలా ద‌గ్గ‌రైపోయింది. దిల్ రాజు సంస్థ నుంచి వ‌స్తున్న చిత్ర‌మిది. నితిన్, రాశీఖన్నా జంట‌గా న‌టించారు. ఆగ‌స్టు 9న విడుద‌ల అవుతోంది. “నా కూతురి పెళ్లి, మ‌న‌వ‌డు పుట్టిన క్ష‌ణాలు, భార్య చ‌నిపోయిన‌ప్పుడు అనుభ‌వించిన బాధ.. ఇలా నా జీవితంలో నేను చూసిన అనుభ‌వాలే ఈ సినిమా. ఈ చిత్రంలోని పాత్ర‌లు ప్రేక్ష‌కుల మ‌న‌సుల్లో నిలిచిపోతాయి. ఇంటికెళ్లిన త‌ర‌వాత కూడా గుర్తుండిపోయే స‌న్నివేశాలున్నాయి. ఆగ‌స్టు 9 త‌ర‌వాత ప్ర‌తీ ఇంట్లోనూ ఓ పెళ్లి జ‌రుగుతోంద‌న్న భావ‌న తీసుకొచ్చే సినిమా అవుతుంద“న్నారు దిల్‌రాజు. “త్రేతాయుగం, ద్వాప‌ర యుగం, క‌లియుగం… ఇలా యుగాలు మారినా, దేవుడు మ‌నిషి అవ‌తారం ఎత్తినా పెళ్లి గొప్ప‌ద‌నం గురించి చెబుతూనే ఉన్నాడు. మేం కూడా ఈ సినిమాలో అదే చెప్పాం. పెళ్లి విశిష్ట‌త‌ని చాటి చెప్పే చిత్రం అవుతుంద“న్నారు స‌తీష్ వేగ్నేశ. ఈసినిమాలో న‌టించిన న‌టీన‌టులంతా ఈ క‌థ‌ని, త‌మ పాత్ర‌నీ మ‌న‌సుల్లోకి ఎక్కించేసుకున్న‌ట్టున్నారు. అందుకే రాశీఖన్నా, ప్ర‌కాష్‌రాజ్‌, రాజేంద్ర ప్ర‌సాద్ వీళ్ల మాట‌ల్లో భావోద్వేగాలు ఎక్కువ‌గా క‌నిపించాయి. మ‌రి.. ప్రేక్ష‌కుల్నీ ఈ సినిమా అలానే క‌దిలిస్తే… దిల్‌రాజు బ్యాన‌ర్‌లో మ‌రో హిట్టు ప‌డిపోయిన‌ట్టే.
నేను చూసిన అనుభ‌వాలే ఈ సినిమా: దిల్‌రాజు
