ఇప్పుడు టాలీవుడ్ ట్రెండ్ ఏమిటంటే రచయితలు డైరక్టర్లు కావడం. అలా మారిన డైరక్టర్లు మళ్లీ కావాలంటే పెన్ను చేత్తో పట్టుకోవచ్చు. ఎందుకంటే అది వచ్చిన విద్యనే కదా. హీరో నిఖిల్ ఆ మధ్య తన కిర్రాక్ పార్టీ సినిమాకు డైరక్టర్ చందు మొండేటితో డైలాగులు రాయించుకున్నాడు. నిఖిల్ తో వున్న స్నేహంతో చందు మొండేటి ఒక పక్క తన డైరక్షన్ వ్యవహారాలు చూసుకుంటూనే ఆ సినిమాకు డైలాగులు రాశాడు.
ఇప్పుడు అదే నిఖిల్ సినిమాకు మరో డైరక్టర్ మాటలు రాసే పని చేపట్టారు. లేటెస్ట్ గా టాగోర్ మధు నిర్మిస్తున్న ముద్ర సినిమాకు డైరక్టర్ కృష్ణ చైతన్య డైలాగులు రాసారట. ముద్ర సినిమా తమిళ్ రీమేక్. దీని కోసం ఓ డైలాగ్ వెర్షన్ ముందు రెడీ చేయించారు. కానీ అది అంత పూర్తి సంతృప్తి ఇవ్వకపోవడంతో, నిఖిల్ కోరి కృష్ణ చైతన్యను రిక్వెస్ట్ చేసారట.
దాంతో ప్రస్తుతం తరువాత ప్రాజెక్టు మీద డిస్కషన్లలో వున్న దర్శకుడు కృష్ణ చైతన్య, ఈ గ్యాప్ లో ముద్ర సినిమాకు ఓ వెర్షన్ రాసి ఇచ్చారట. కృష్ణ చైతన్య ఓ పక్క డెప్త్ వున్న డైలాగులు, మరో పక్క సెన్సిటివ్ ఫన్ పండించగలరు. అందువల్ల ముద్రకు ఇది అదనపు అడ్వాంటేజ్ అనుకోవాలి.
