పూరి జ‌గ‌న్నాథ్ రాసుకొన్న డిఫరెంట్ క‌థ‌ల్లో ‘ఇస్మార్ట్ శంక‌ర్‌’ ఒక‌టి. హీరో మెద‌డులో చిప్ పెట్టి – దాని చుట్టూ కావ‌ల్సినంత యాక్ష‌న్, డ్రామా, వినోదం న‌డిపించేశారు. ఆ పాయింట్ కొత్త‌గా అనిపించింది. ఇప్పుడు ‘డ‌బుల్ ఇస్మార్ట్’ వ‌స్తోంది. ఇందులో పూరి కొత్త‌గా ఏం చెప్ప‌బోతున్నాడు? కొత్త‌గా ఏం చూపించ‌బోతున్నాడు? అనే ఆస‌క్తి నెల‌కొంది అంద‌రిలోనూ.
అయితే ఈసారి కూడా పూరి ‘చిప్’నే న‌మ్ముకొన్నాడు. కాక‌పోతే.. చిప్ మారిందంతే. ‘ఇస్మార్ట్ శంక‌ర్‌’లో స‌త్య‌దేవ్ చిప్.. రామ్ లో ఫిక్స్ చేస్తారు. ఈసారి.. సంజ‌య్ ద‌త్ చిప్ వాడార‌ని టాక్‌. సంజూభాయ్ ఈ సినిమాలో ప్ర‌తినాయ‌కుడిగా న‌టిస్తున్న సంగ‌తి తెలిసిందే. అత‌ని మెమొరీని హీరోలో ఇంజెక్ట్ చేస్తారు. ఆ త‌ర‌వాత జ‌రిగే డ్రామానే ‘డ‌బుల్ ఇస్మార్ట్’ క‌థ. ప్ర‌స్తుతం ముంబైలో ఓ కీల‌క‌మైన షెడ్యూల్ న‌డుస్తోంది. దీంతో టాకీ పూర్త‌వుతుంది. ఆ త‌ర‌వాత పాట‌ల్ని హైద‌రాబాద్ లోనే తెర‌కెక్కిస్తారు. మ‌ణిశ‌ర్మ ఈ చిత్రానికి బాణీలు స‌మ‌కూరుస్తున్న సంగ‌తి తెలిసిందే. ‘ఇస్మార్ట్ శంక‌ర్లో’ పాట‌ల‌న్నీ హిట్టే. ఈసారి అంత‌కు మించిన ఆల్బ‌మ్ రాబోతోంద‌ని టాక్‌. మూడు మాస్ పాట‌ల్ని ఈ సినిమా కోసం మ‌ణిశ‌ర్మ కంపోజ్ చేశారు. అమ్మ సెంటిమెంట్ తో ఓ పాట కూడా ఉంద‌ని టాక్‌. త్వ‌ర‌లోనే టీజ‌ర్ విడుద‌ల చేసేందుకు చిత్ర‌బృందం స‌న్నాహాలు చేస్తోంది.
