రామ్ – పూరి జ‌గ‌న్నాథ్ కాంబోలో వ‌చ్చిన ‘ఇస్మార్ట్ శంక‌ర్‌’ ఇన్‌స్టెంట్ హిట్ అయిపోయింది. రామ్ కెరీర్‌లోనే భారీ వ‌సూళ్ల‌ని అందుకొన్న సినిమా ఇది. ఇప్పుడు ఈ చిత్రానికి సీక్వెల్‌గా ‘డ‌బుల్ ఇస్మార్ట్’ రూపొందుతోంది. మార్చిలోనే విడుద‌ల కావాల్సిన సినిమా ఇది. అయితే అనివార్య కార‌ణాల వ‌ల్ల వాయిదా ప‌డింది. కొంత‌కాలంగా షూటింగ్ కూడా జ‌ర‌గ‌లేదు. ఎట్ట‌కేల‌కు ఇప్పుడు కొత్త షెడ్యూల్ ప్రారంభించుకొంది. ముంబైలో మ‌రో ద‌ఫా షూటింగ్ మొద‌లెట్టారు. ఈ షెడ్యూల్ తో టాకీ మొత్తం పూర్త‌వుతుంది. ఆ త‌ర‌వాత పాట‌ల్ని తెర‌కెక్కిస్తే సినిమా అయిపోయిన‌ట్టే.
సంజ‌య్‌ద‌త్ ఈ చిత్రంలో కీల‌క పాత్ర పోషిస్తున్న సంగతి తెలిసిందే. మ‌ణిశ‌ర్మ స్వరాలు అందిస్తున్నారు. ‘ఇస్మార్ట్ శంక‌ర్‌’లో పాట‌ల‌న్నీ మాసీగా సాగిపోయాయి. ఈసారీ.. అదే మ్యాజిక్ రిపీట్ చేయ‌బోతున్నార్ట. యాక్ష‌న్‌, మాస్‌, బీట్.. ఇవ‌న్నీ టైటిల్ కి త‌గ్గ‌ట్టుగానే `డ‌బుల్ డోస్‌`లో ఉండ‌బోతున్నాయ‌ని చిత్ర‌బృందం చెబుతోంది. ఇప్ప‌టికే ఓటీటీ హ‌క్కులు నెట్ ఫ్లిక్స్‌కి అమ్మేసిన‌ట్టు టాక్‌. థియేట్రిక‌ల్ రైట్స్ రూపంలోనూ క్రేజీ ఆఫ‌ర్లు అందుతున్నాయి. త్వ‌ర‌లోనే రిలీజ్‌డేట్ విష‌యంలోనూ ఓ క్లారిటీ రాబోతోంది. ఇక‌పై `డ‌బుల్ ఇస్మార్ట్`కి సంబంధించి రెగ్యుల‌ర్ అప్‌డేట్లు ఉంటాయ‌ని పూరి స‌న్నిహితులు చెబుతున్నారు.
