మేలో ‘నారప్ప‌’ విడుద‌ల కావాల్సివుంది. ఇది వ‌ర‌కే డేట్ కూడా ఇచ్చేశారు. అయితే ప్ర‌స్తుతం `నార‌ప్ప‌` రావ‌డం క‌ష్ట‌మే. నార‌ప్ప కోసం మ‌రో మంచి డేట్ వెదికే ప‌నిలో ఉన్నారు సురేష్ బాబు. అయితే మ‌రో అనూహ్య‌మైన మ‌రో సంగ‌తేంటంటే.. ఇటీవ‌లే ప‌ట్టాలెక్కిన ‘దృశ్య‌మ్ 2’ని ‘నారప్ప‌’ కంటే ముందే విడుద‌ల చేయ‌బోతున్నార్ట‌. మ‌ల‌యాళంలో విడుద‌లైన దృశ్య‌మ్ ని తెలుగులో వెంక‌టేష్ రీమేక్ చేసిన సంగ‌తి తెలిసిందే. ఇప్పుడు `దృశ్య‌మ్ 2` కూడా రావ‌డం, ఆ సినిమాకీ వెంకీ రీమేక్ చేస్తుండ‌డం తెలిసిన విష‌యాలే. `నారప్ప‌` షూటింగ్ అయ్యాకే.. వెంక‌టేష్ `దృశ్య‌మ్ 2` మొద‌లెట్టాడు. నార‌ప్ప త‌ర‌వాతే… దృశ్య‌మ్ రావాల్సివుంది. కానీ… ఇప్పుడు ప‌రిస్థితులు మారాయి. నార‌ప్ప‌ని హోల్డ్ లో పెట్టి, దృశ్య‌మ్ 2 ని విడుద‌ల చేయాల‌ని సురేష్ బాబు ప్లాన్ చేస్తున్నారు. ఈనెలాఖ్‌రులోగా.. `దృశ్య‌మ్ 2` షూటింగ్ మొత్తం పూర్త‌వుతుంది. మేలో పోస్ట్ ప్రొడ‌క్ష‌న్ ప‌నులు జ‌రిపి, జూన్‌లో విడుద‌ల చేసే అవ‌కాశం ఉంది. ఆ త‌ర‌వాతే.. `నార‌ప్ప‌` రావొచ్చు.