ఈ సంక్రాంతి విజేత‌గా నిలిచిన సినిమా `ఎఫ్ 2`. భీక‌ర‌మైన పోటీ మ‌ధ్య నిలిచి, గెలిచి… సూప‌ర్ హిట్ అనిపించుకుంది. ఈ సినిమా విడుద‌లై 25 రోజులైనా.. ఇంకా వ‌సూళ్లు ఏమాత్రం త‌గ్గ‌లేదు. ఫిబ్ర‌వ‌రిలో కొత్త సినిమాల తాకిడి త‌క్కువ‌గానే ఉంది. సినిమాలొస్తున్నా, వాటిపై ప్ర‌త్యేక‌మైన క్రేజ్ లేదు. ఈ నేప‌థ్యంలో `ఎఫ్ 2` మ‌రిన్ని రోజులు త‌న హవా చూపించ‌డం ఖాయంగా క‌నిపిస్తోంది. అయితే.. ఇప్పుడు ఈ వ‌సూళ్ల‌కు అమేజాన్ గండి కొట్ట‌బోతోంది. ఈ సినిమాని విడుద‌ల‌కు ముందే అమేజాన్ ప్రైమ్‌కి అమ్మేశారు దిల్‌రాజు. ముంద‌స్తు ఒప్పందం ప్ర‌కారం.. సినిమా విడుద‌లైన 30 రోజుల త‌ర‌వాత ఎప్పుడైనా అమేజాన్‌లో ప్ర‌ద‌ర్శించుకోవొచ్చు. ఎఫ్ 2 సూప‌ర్ హిట్ సినిమా. ఈ సినిమా అమేజాన్‌లో పెడితే…. వ్యూస్ అద్భుతంగా ఉండ‌డం ఖాయం. అందుకే అమేజాన్ ఏమాత్రం ఆల‌స్యం చేయ‌డం లేదు. ఈనెల 11నే ఈ చిత్రాన్ని అమేజాన్‌లో ఉంచ‌బోతోంది. లాప్ టాప్‌లోనూ, సెల్ ఫోన్ల‌లోనూ హెచ్ డీ ప్రింటు ద‌ర్శ‌న‌మివ్వ‌బోతోంది. ఇక థియేట‌ర్ల‌కు వెళ్లాల్సిన అవ‌స‌రం లేదు. `ఎఫ్ 2` జోరు బాక్సాఫీసు ద‌గ్గ‌ర త‌గ్గ‌క ముందే… ఇప్పుడు అమేజాన్లోకి వ‌చ్చేస్తోందీ సినిమా. ఓ ర‌కంగా.. దిల్‌రాజుకి ఇది బ్యాడ్ న్యూసే.