సీనియర్ ఎన్టీఆర్ మద్రాసులో వున్నప్పుడు ఉదయం నాలుగు గంటలకు ఆయన ఇంటి ముందు అభిమానులు బారులు తీరేవారు. ఆయన్ను చూడటం కోసం ఇంటి ముందు ఓపిగ్గా ఎదురు చూసేవారు. ఇంచు మించు అటువంటి సన్నివేశమే శనివారం రాత్రి హైదరాబాద్‌లో జూనియర్ ఎన్టీఆర్ ఇంటి ముందు కనిపించింది. ఈ రోజు యంగ్ టైగర్ పుట్టినరోజు అన్న సంగతి తెలిసిందే. ఆయనకు పుట్టినరోజు శుభాకాంక్షలు చెప్పడం కోసం చాలా మంది అభిమానులు అర్ధరాత్రి ఇంటికి వెళ్లారు. వాళ్ల సందడితో ఎన్టీఆర్ ఇంటి రోడ్డు అంతా కోలాహలంగా మారింది. పుట్టినరోజు సందర్భంగా దర్శకుడు త్రివిక్రమ్ శ్రీనివాస్ ఇచ్చిన కానుక కూడా అభిమానులకు విపరీతంగా నచ్చింది. ఎన్టీఆర్ హీరోగా త్రివిక్రమ్ దర్శకత్వంలో హారిక హాసిని క్రియేషన్స్ పతాకంపై ఎస్. రాధాకృష్ణ (చినబాబు)నిర్మిస్తున్న సినిమా ‘అరవింద సమెత’. వీరరాఘవ… అనేది కాప్షన్. ఇందులో ఎన్టీఆర్ ఫస్ట్ లుక్‌ని నిన్నే విడుదల చేశారు. సిక్స్ ప్యాక్‌తో చేతిలో కత్తితో త్రివిక్రమ్ ఆయన్ని చూపించిన విధానం అభిమానులకు బాగా నచ్చింది.