సీక్వెల్స్ హావా న‌డుస్తోంది ఇప్పుడు. ‘కార్తికేయ 2’ సూప‌ర్ హిట్ట‌య్యింది. టిల్లూ దీ అదే జోరు. ఇప్పుడు గీతాంజ‌లి సీక్వెల్ వ‌స్తోంది. అంజ‌లి – కోన వెంక‌ట్ కాంబినేష‌న్ లో రూపొందిన హార‌ర్ కామెడీ సినిమా ‘గీతాంజ‌లి’. ఆ సినిమా మంచి విజ‌యాన్ని అందుకొంది. ఇప్పుడు సీక్వెల్ గా ‘గీతాంజ‌లి మ‌ళ్లీ వ‌చ్చింది’ తీశారు. జీవి ద‌ర్శ‌క‌త్వం వ‌హించిన ఈ చిత్రం ఈనెల 11న వ‌స్తోంది. ఇప్పుడు ట్రైల‌ర్ ఆవిష్క‌రించారు.
ఓ దెయ్యాల కొంప. అక్క‌డ.. షూటింగ్ చేయ‌డానికి వెళ్లిన ఓ టీమ్‌. వాళ్ల‌తో అందులో దెయ్యాలు ఆడుకోవ‌డం.. ఇదీ సింపుల్ గా ‘గీతాంజ‌లి మ‌ళ్లీ వ‌చ్చింది’ క‌థ. ‘గీతాంజ‌లి’లో మెరిసిన తార‌లంతా ఇందులోనూ క‌నిపించ‌నున్నారు. శెన‌క్కాయ‌ల శీనుగా శ్రీ‌నివాస‌రెడ్డి ఈ సినిమాలో ద‌ర్శ‌కుడి అవ‌తారం ఎత్తాడు. కెమెరామెన్‌గా సునీల్ క‌నిపించ‌నున్నాడు. దెయ్యాల్ని కూడా ఆర్టిస్టులు అనుకొని, వాళ్ల‌తో షూటింగ్ చేసేయ‌డం ఈ సినిమా స్పెషాలిటీ. అయితే క‌థ‌లో ట్విస్టులూ, ట‌ర్న్‌లూ ఆక‌ట్టుకొంటాయ‌ని చిత్ర‌బృందం చెబుతోంది. అంజ‌లి న‌టించిన 50వ చిత్ర‌మిది. కాబ‌ట్టి స‌మ్ థింగ్ స్పెష‌ల్ గా ఉండాల‌ని అంజ‌లి కూడా కోరుకుంటోంది. ఒక‌ప్పుడు హార‌ర్ కామెడీ క‌థ‌లు తెగ వ‌చ్చేవి. అందులో కొన్ని బాగా ఆడాయి కూడా. కానీ ఆ త‌ర‌వాత వాటిపై మొహం మొత్తేసింది. ‘గీతాంజ‌లి’ సీక్వెల్ తో అయినా ఈ జోన‌ర్‌కు మ‌ళ్లీ పాత రోజులు వ‌స్తాయేమో చూడాలి.
