ప‌వ‌న్ ఫ్యాన్స్‌కు ఓ గుడ్ న్యూస్‌! చాలాకాలంగా ప‌వ‌న్ అంటే రాజ‌కీయాల‌కు సంబంధించిన విష‌యాలే గుర్తుకు వ‌స్తున్నాయి. ఆయిన పాలిటిక్స్ తో అంత బిజీ అయ్యారు. అందుకే సినిమాల‌కు గ్యాప్ ఇచ్చారు. ఎన్నిక‌లు పూర్త‌య్యేంత వ‌ర‌కూ అటు ప‌వ‌న్ కు, ఇటు ఆయ‌న అభిమానుల‌కు సినిమాల గురించి ఆలోచించేంత టైమ్ లేదు. అయినా స‌రే… వేస‌వి గాలుల్లో.. ఓ పిల్ల తిమ్మెర‌లా.. ప‌వ‌న్ సినిమాల‌కు సంబంధించిన ఓ అప్ డేట్ బ‌య‌ట‌కు వ‌చ్చింది. మే 2న ‘హ‌రి హ‌ర వీర‌మ‌ల్లు’ టీజ‌ర్ రాబోతోంది. ఈ విష‌యాన్ని మేక‌ర్స్ అధికారికంగా ప్ర‌క‌టించారు కూడా.

మే 2.. ఉద‌యం 9 గంట‌ల‌కు టీజ‌ర్‌ని బ‌య‌ట‌కు వ‌దులుతారు. ‘వీర‌మ‌ల్లు’ ప‌వ‌న్ కు చాలా ముఖ్య‌మైన సినిమా. దీనిపై నిర్మాత ఏ.ఎం.ర‌త్నం బాగా ఖ‌ర్చు పెట్టారు. ఈ సినిమాపై ర‌క‌ర‌కాల వ‌దంతులూ వినిపించాయి. సినిమా ఆపేస్తార‌ని, ద‌ర్శ‌కుడు మార‌తాడ‌ని ఎన్నో ర‌కాలుగా మాట్లాడుకొన్నారు. కానీ టీమ్ మాత్రం త‌న ప‌ని తాను చేసుకొంటూ వెళ్తోంది. ఎన్నిక‌లు అయ్యాక‌.. అటు ‘ఓజీ’కీ ఇటు ‘వీర‌మ‌ల్లు’కీ స‌మానంగా డేట్లు కేటాయించి, రెండు సినిమాల్నీ ఒకేసారి పూర్తి చేస్తార‌ని ప‌వ‌న్ స‌న్నిహితులు చెబుతున్నారు.

ఈ ఎన్నిక‌ల నేప‌థ్యంలో టీజ‌ర్‌లో పొలిటిక‌ల్ డైలాగులు ఏమైనా సంధిస్తారా? అనే ఆస‌క్తి వ్య‌క్తం అవుతోంది. ఇది పొలిటిక‌ల్ చిత్రం కాదు. కానీ.. ‘పాల‌న‌’ త‌దిత‌ర వ్య‌వ‌హారాల‌పై విమ‌ర్శ‌నాస్త్రాలు సంధించే ఛాన్స్ అయితే పుష్క‌లంగా ఉంది.