తెలంగాణలో మరోసారి సెలబ్రేషన్‌ మూడ్‌లోకి వెళ్లడానికి తెలంగాణ రాష్ట్ర సమితి శ్రేణులు సిద్ధమవుతున్నారా? అంటే అవునని ఇప్పుకోవాల్సిందే. బుధవారం మెదక్‌జిల్లా సిద్దిపేట మునిసిపాలిటీకి ఎన్నికలు జరగబోతున్నాయి. ఇప్పటిదాకా రాష్ట్రవ్యాప్తంగా జరుగుతున్న ఎన్నికల్లో వ్యక్తమవుతున్న జనాభిప్రాయానికి భిన్నంగా ఇక్కడ ఫలితాలు ఉంటాయని అనుకోవాల్సిన అవసరం ఎంతమాత్రమూలేదు. విజయబావుటా ఎగురవేసేసాంప్రదాయాన్ని తెరాస ఇక్కడ కూడా కొనసాగించబోతున్నది. అందులో సందేహం లేదు. సందేహమెల్లా… ఈ మునిసిపాలిటీలోనైనా ప్రతిపక్షాలకు ఏమైనా వార్డులు ఇస్తారా లేదా అచ్చంపేట ఫలితాలను రిపీట్‌ చేస్తారా? అనేది మాత్రమే. సిద్దిపేట ఎమ్మెల్యే, తెరాస సర్కారులో కీలక మంత్రి, కేసీఆర్‌ అల్లుడు హరీష్‌రావు మాత్రం.. సిద్దిపేటలో మొత్తం అన్ని వార్డులనూ తామే గెలుచుకుంటాం అని చాలా నమ్మకంగా చెబుతున్నారు. ప్రతిపక్షాలకు ఒక్క వార్డు కూడా దక్కదంటున్నారు. పార్టీ పరంగా సాగుతున్న చర్చల ప్రకారం.. అలాగే జరగాలి.. అలా జరిగితేనే హరీష్‌కు ఉన్న గౌరవం ఇనుమడిస్తుంది అని అంతా అనుకుంటున్నారు.
సిద్దిపేట అంటే తెరాసకు కంచుకోట. ఈ నియోజకవర్గంలో హరీష్‌రావు.. ఎప్పటికీ తనకు తిరుగులేని మంచి ఎమ్మెల్యేగా ప్రతిష్ట సంపాదించి మంచి స్థానానికి ఎదిగారు. సిద్దిపేటలో హరీష్‌ను ఎవ్వరూ ఓడించలేరనేంతగా ఆయన ప్రజలకు చేరువైన ఎమ్మెల్యేగా పేరు తెచ్చుకున్నారు. సిద్దిపేటలో చాలాకాలం ముందునుంచి కూడా హరీష్‌కు ‘కాయిన్‌ బాక్స్‌ ఎమ్మెల్యే’ అని పేరు. సిద్దిపేట పరిధిలో కాయిన్‌బాక్స్‌నుంచి రూపాయి వేసి ఫోనుచేస్తే.. ఎమ్మెల్యే కచ్చితంగా పలుకుతాడని, సమస్య తీరుతుందని అక్కడి ప్రజల్లో ఆయన పట్ల ఉన్న నమ్మకం. చాలా శక్తిమంతమైన ఎమ్మెల్యేగా ఆయనకు పేరుంది.
అసలే ప్రస్తుతం తెలంగాణ రాష్ట్ర వ్యాప్తంగా తెరాస హవా బీభత్సంగా నడుస్తున్నది. ఎక్కడ ఏ ఎన్నికలు జరిగినా ఆ పార్టీనే విజయం సాధిస్తున్నది. ఖమ్మం, వరంగల్‌ కార్పొరేషన్లను ఎలా గెలిచారో అందరికీ తెలుసు. తెరాస బలహీనం అనుకునే పాలమూరు జిల్లాలో అచ్చంపేట మునిసిపాలిటీలో నూరుశాతం వార్డులు గులాబీ ఖాతాలోనే పడ్డాయి. మరి కేవలం పార్టీ హవానే అంత బీభత్సంగా ఉన్నప్పుడు.. దానికి హరీష్‌ రావు చరిష్మా తోడైతే విజయం ఎంత అత్యద్భుతంగా ఉండాలి? అందుకే ఆ విషయం మీదే ఇప్పుడు సిద్దిపేటలో చర్చలు జరుగుతున్నాయి.
అన్ని వార్డులు గెలుచుకోవడం మాత్రమే కాదు.. ఒక్క వార్డులో కూడా కూడా ప్రత్యర్థులకు డిపాజిట్లు రావని హరీష్‌రావు అంటున్నారు. అవును ఆయన చరిష్మా కు తగిన ఫలితం రావాలంటే.. అదే ఫలితాలు వెల్లడి కావాలి. అలా జరిగితేనే పార్టీలోనూ ఆయన గౌరవం పెరుగుతుందని పార్టీ వర్గాలు అంటున్నాయి.