పవన్ కళ్యాణ్ సాయి, ధరమ్ తేజ్ ల ‘బ్రో ‘సినిమా ఈ శుక్రవారం విడుదలకు రెడీ అయ్యింది. ప్రమోషన్స్ జోరుగా చేస్తున్నారు. ఈ రోజు ప్రీరిలీజ్ ఈవెంట్ కూడా జరుగుతుంది. అంతా బావుంది కానీ ఇప్పుడీ సినిమాకి భారీ వర్షాల బెంగపట్టుకుంది. వాయువ్య బంగాళాఖాతంలోని ఉపరితల ఆవర్తనం ప్రభావంతో రెండు తెలుగు రాష్ట్రాల్లో భారీ వర్షాలు కురుస్తున్నాయి. ఈ అల్ప పీడనం వాయుగుండంగా మారే అవకాశం ఉందని, అత్యంత భారీ వర్షాల కురిసే నేపథ్యంలో మూడు రోజులు పాటు రెడ్ అలర్ట్ జారీ చేస్తున్నట్లు వాతావరణ శాఖ ఇప్పటికే తెలిపింది.
ఇవే వర్షాలు కొనసాగితే గనుక ఖచ్చితంగా బాక్సాఫీసుపై ప్రభావం వుంటుంది. పవన్ కళ్యాణ్ సినిమాకి ఖచ్చితంగా ఓపెనింగ్స్ భారీ స్థాయిలో ఆశిస్తారు. ఐతే ఈ భారీ వర్షాలు కొనసాగితే గనుక ఖచ్చితంగా దాని ప్రభావం ఓపెనింగ్స్ నెంబర్స్ పై వుండే ఛాన్స్ వుంది. పని వుంటే తప్పితే ప్రజలు బయటికి రావద్దని ప్రభుత్వాలు కూడా విజ్ఞప్తి చేస్తున్న నేపధ్యంలో ఈ వాయుగుండాన్ని దాటడం ఇప్పుడు ‘బ్రో’ కి బెంగగా మారింది. ఐతే శుక్రవారం నాటికి పరిస్థితి చక్కదిద్దుకుంటుదని చిత్ర వర్గాలు ఆశభావాన్ని వ్యక్తం చేస్తున్నాయి.
