కొత్త దర్శ‌కుడితో సినిమా అంటే హీరోలు ఇంకాస్త ఎక్కువ స్పేస్ తీసుకొంటుంటారు. త‌మ‌కు కావ‌ల్సిన‌ట్టుగా క‌థ, క‌థ‌నాల్ని మ‌ల‌చుకొంటుంటారు. ద‌ర్శ‌కులు కూడా హీరోల అనుభ‌వాన్ని న‌మ్మి తీరాల్సిందే. వాళ్ల‌కు త‌లొంచాల్సిందే. అయితే కొన్ని చోట్ల మాత్రం ఆర్గ్యుమెంట్లు మొద‌లైపోతాయి. దాంతో సెట్స్‌పై ఉన్నప్పుడే హీరోకీ, ద‌ర్శ‌కుడికీ మధ్య క్లాష్ వ‌స్తుంటుంది. `హాయ్ నాన్న` విష‌యంలోనూ ఇదే జ‌రిగిందని, ఆ సినిమా ద‌ర్శ‌కుడు శౌర్య‌వ్‌కీ నానీకి చిన్న చిన్న ఈగో క్లాషులు వ‌చ్చాయ‌ని ఇండ‌స్ట్రీలో ఓ టాక్ వినిపిస్తోంది. దీనిపై శౌర్య‌వ్ క్లారిటీ ఇచ్చేశాడు.
”నానికీ నాకూ గొడ‌వ జ‌రిగింద‌న్న మాట‌ల్లో ఎలాంటి నిజం లేదు. మా ప‌ని మేం ప్ర‌శాంతంగా చేసుకొంటూ వెళ్లిపోయాం. సెట్లో ఏం తీయాలి? అనే విష‌యంపై నాకు క్లారిటీ ఉంది. నాని న‌న్ను న‌మ్మారు. ఇంక గొడ‌వ‌కు ఆస్కారం ఏముంటుంది? ఇదో ఫీల్ గుడ్ మూవీ. మేం కూడా అలాంటి ఫీల్ తోనే ప‌ని చేశాం. ద‌ర్శ‌కుల‌కు ఎక్కువ స్పేస్ ఇస్తుంటారు నాని. అందుకే కొత్త ద‌ర్శ‌కులు ఆయ‌న‌తో అంత‌లా మింగిల్ అవుతుంటారు” అని ఈ రూమ‌ర్స్‌ని కొట్టి ప‌డేశారు. శౌర్య‌వ్ కి ఇదే తొలి సినిమా. ఈనెల 7న `హాయ్ నాన్న` విడుద‌ల అవుతున్న సంగ‌తి తెలిసిందే.
