హైదరాబాదులో గణేశ్‌ ఉత్సవాల సమయంలో విగ్రహాలను హుసేన్‌ సాగర్‌లో నిమజ్జనం చేయడానికి సంబంధించిన వ్యవహారం గురువారం నాడు హైకోర్టు విచారణకు వచ్చింది. హుసేన్‌సాగర్‌లో నిమజ్జనం ను నిలిపి వేయించి, నిమజ్జనం కోసం ప్రత్యేకంగా ఒక వినాయకసాగర్‌ను ఏర్పాటుచేయడం, హుసేన్‌సాగర్‌ ప్రక్షాళనకు ముమ్మరంగా చర్యలు చేపట్టడం అనే ప్రభుత్వ ఆలోచనకు వ్యతిరేకంగా దాఖలైన పిటిషన్‌ అది. ఈ విషయంలో హైకోర్టు తీర్పు ఇస్తూ.. హుసేన్‌సాగర్‌లో నిమజ్జనం కొనసాగించాల్సిందేనంటూ తీర్పు చెప్పింది. బెంగుళూరు తరహాలో ప్రత్యేకమైన ఏర్పాట్లు చేసినట్లయితే… సాగర్‌ కాలుష్యం పరంగా పెద్దగా ఇబ్బందులు ఎదురు కాకపోవచ్చునంటూ ప్రభుత్వానికి ఒక సూచన కూడా చేసింది.
ఇంతవరకు బాగానే ఉంది. అయితే పర్యావరణానికి విపరీతంగా హాని కలిగిస్తున్న వినాయక విగ్రహాలకు వాడే రసాయన రంగులు, భారీ ఎత్తులతో విగ్రహాలను తయారు చేయడం వంటి విషయాలలో మాత్రం కోర్టు జోక్యం చేసుకోకపోవడం గమనార్హం. ఎందుకంటే.. వినాయక విగ్రహాలకు సహజసిద్ధ రంగులు మాత్రమే వాడేలా చర్యలు తీసుకోవాలంటూ ప్రభుత్వానికి ఓ సూచన చేసి హైకోర్టు ఊరుకుంది. దానికి తగినట్లుగానే.. సహజ రంగుల వినియోగాన్ని పెంపొందించేందుకు ప్రభుత్వం తరఫున 5 కోట్ల రూపాయలు కేటాయించాం అంటూ సర్కారు తరఫున న్యాయవాది కూడా నివేదించారు. అయితే ఈ వృథా అంతా అర్థం లేనిది. సహజ రంగులను వాడకపోతే.. వినాయక విగ్రహాలకు అనుమతి ఇవ్వరాదు.. అని కోర్టు స్పష్టంగా ఆదేశించి ఉంటే గనుక.. ఈ ఏడాది విగ్రహాల పరంగా పర్యావరణానికి బోలెడంత మేలు ఖచ్చితంగా జరిగేది.
అలాగే ఎత్తు విషయంలో కూడా.. ఏదో మమ అనిపించినట్లుగా ప్రభుత్వం పట్టించుకోవాలి అని ఊరుకోకుండా.. హైకోర్టు స్పష్టమైన ఆదేశాలు ఇచ్చి ఉంటే ఇంకా చాలా బాగుండేదని పలువురు భావిస్తున్నారు. ఈ విషయాలు ప్రత్యేకించి పిటిషన్‌లో అంశాలుగా లేకపోయినప్పటికీ.. ఇప్పుడు ప్రభుత్వానికి సూచనలు చేసిన తరహాలోనే.. హైకోర్టు తనంతగా శ్రద్ధ తీసుకుని అలాంటిది ప్రభుత్వం విధిగా చేసేలా చెప్పి ఉంటే బాగుండేదని పలువురు భావిస్తున్నారు.