దొంగ – పోలీస్ ఆట‌లో.. ఎవ‌రి ధైర్యం వాళ్ల‌ది. ఎంత పెద్ద త‌ప్పు చేసినా – ఈజీగా త‌ప్పించుకోవ‌చ్చ‌న్న ధీమా దొంగ‌దైతే, ఎంత పెద్ద దొంగైనా చిన్న త‌ప్పు చేసి దొరికిపోతాడు అనే ధీమా పోలీస్‌ది. `హిట్ 2`లో కేడీ (అడ‌విశేష్‌)దీ అదే ధైర్యం. సిటీలో ఓ దారుణ‌మైన‌ మ‌ర్డ‌ర్ జ‌రుగుతుంది. హంత‌కుడ్ని ప‌ట్టేసుకొంటాన‌న్న అతి ధీమాతో `క్రిమిన‌ల్స్ వి కోడి బుర్ర‌లు.. 5 నిమిషాలు చాలు వీళ్ల‌ని ప‌ట్టుకోవ‌డానికి` అని తేలిగ్గా తీసుకొంటాడు ఇన్వెస్టిగేష‌న్ ఆఫీస‌ర్ కేడీ. అదే… ఆ క్రిమిన‌ల్ ని ఉడికిస్తుంది. త‌న కోడి బుర్ర ప‌దునెంతో… చూపించాల‌నుకొంటాడు. ఆ త‌ర‌వాత‌… ఏం జ‌రిగింద‌న్న‌ది… `హిట్ 2` చూసి తెలుసుకోవాలి.

నాని నిర్మాత‌గా తెర‌కెక్కించిన `హిట్` మంచి విజ‌యాన్ని అందుకొంది. ఇప్పుడు దానికి సీక్వెల్ గా `హిట్ 2` వ‌స్తోంది. శైలేష్ కొల‌ను ద‌ర్శ‌క‌త్వం వ‌హించిన చిత్ర‌మిది. ఆడ‌వి శేష్ క‌థానాయకుడు. డిసెంబ‌రు 2న విడుద అవుతోంది. ఈరోజు ట్రైల‌ర్ బ‌య‌ట‌కు వ‌చ్చింది. ట్రైల‌ర్ అంతా…సీరియ‌స్‌గా సాగింది. ఓ మ‌ర్డ‌ర్ కేసు ఇన్వెస్టిగేష‌న్ మొద‌లెట్టిన హీరోకి, అడుగ‌డుగునా అవాంత‌రాలు ఎదురైతే, దారుల‌న్నీ మూసుకుపోతే, క్రిమిన‌ల్ స‌వాళ్లు విసురుతుంటే… ఏం జ‌రిగింద‌న్న‌ది ఉత్కంఠ భ‌రితంగా చూపించారు. బ్యాక్ గ్రౌండ్ స్కోర్‌, విజువ‌ల్స్ ఓ ఇంగ్లీష్ సినిమా చూస్తున్న ఫీలింగ్ క‌లిగించాయి. హంత‌కుడు ఎవ‌ర‌న్న‌ది ట్రైల‌ర్‌లో చూపించ‌లేదు. సినిమాలో కూడా అదే పెద్ద ట్విస్ట్ కావొచ్చు. హిట్ లా హిట్ 2 కూడా… హిట్టు కొట్టి, హిట్ 3కి బాట‌లు వేసేలానే క‌నిపిస్తోంది ట్రైల‌ర్‌. పైగా అడ‌విశేష్ మంచి స్పీడు మీద ఉన్నాడు. అన్నీ అనుకొన్న‌ట్టు జ‌రిగితే… త‌న ఖాతాలో మ‌రో హిట్టు గ్యారెంటీ!