ఈమ‌ధ్య వార్నింగుల ట్రెండు న‌డుస్తోంది. మొన్న‌టి మొన్న‌ ‘మెకానిక్ రాఖీ’ ప్రీ రిలీజ్ ఫంక్ష‌న్‌లో విశ్వ‌క్‌సేన్ రివ్యూ రైట‌ర్ల‌పై విరుచుకుప‌డ్డాడు. ‘వీపులు ప‌గులుతాయ్‌’ అంటూ హెచ్చ‌రించాడు. ఏం పీక‌లేరు అంటూ సంజ్ఞ‌లు చేశాడు. ఇప్పుడు హైప‌ర్ ఆది కూడా అలాంటి స్ట్రాంగ్ వార్నింగే ఇచ్చాడు. ట్రోల‌ర్స్ పై త‌న దైన శైలిలో చెల‌రేగిపోయాడు. ‘కేసీఆర్’ అనే సినిమా ప్రీ రిలీజ్ ఫంక్ష‌న్‌లో హైప‌ర్ ఆది మెరిశాడు. సాధార‌ణంగా హైప‌ర్ కు మైక్ ఇస్తే.. ఆ స్పీచ్ హైపర్‌గానే ఉంటుంది. ఈసారి కూడా అలానే సాగింది.

చాలామంది జ‌బ‌ర్ద‌స్త్ షోని చిన్న‌చూపు చూస్తారని, కామెడీనే క‌దా అని తేలిగ్గా తీసుకొంటార‌ని, అయితే అదే షో నుంచి ఎంతోమంది ద‌ర్శ‌కులు, హీరోలు వ‌చ్చార‌ని, వాళ్ల వ‌ల్ల ఎన్నో కుటుంబాలు బ‌తుకుతున్నాయ‌ని, త‌మ‌ వీడియోలు కోట్ల‌లో వ్యూస్ ద‌క్కించుకొంటాయ‌ని, కానీ ట్రోల‌ర్స్ వీడియోల‌కు రెండే వ్యూస్ ఉంటాయ‌ని, ఒక‌టి తిట్టిన‌ వాళ్లు చూస్తే, ఇంకోటి తిట్టించుకొన్న వాళ్లు చూస్తార‌ని, ఎప్పుడూ ఇలా లేనిపోనివి మాట్లాడ‌డం త‌ప్ప‌, త‌మ‌నేం పీక‌లేర‌ని… హైప‌ర్ ఆది గ‌ట్టిగానే క్లాస్ పీకాడు.

బ‌ల‌గం వేణు గురించి కూడా హైప‌ర్ ఆది ప్ర‌త్యేకంగా ప్ర‌స్తావించాడు. ఓసారి షోలో.. త‌నేదో స్కిట్ చేస్తే, ఛాంబ‌ర్ ముందు వేణుపై చేయి చేసుకొన్నార‌ని, ఇప్పుడు అదే వేణు బ‌ల‌గం లాంటి గొప్ప సినిమా తీసి, అదే ఛాంబ‌ర్‌లో స‌న్మానాలు చేయించుకొన్నాడ‌ని, ఎవ‌రినీ త‌క్కువ అంచ‌నా వేయొద్ద‌ని స‌ల‌హా ఇచ్చాడు హైప‌ర్‌. ఇదే వేడుక‌కు రోజా కూడా వచ్చారు. రోజా, హైప‌ర్ ఆది.. ఇద్ద‌రూ రెండు వేర్వేరు పార్టీలు. ఇద్ద‌రికీ ప‌డ‌ద‌ని బ‌య‌ట గ‌ట్టిగా ప్ర‌చారం జ‌రుగుతుంటుంది. ‘రోజాని హైప‌ర్ ఆది ఏమ‌న్నాడో తెలుసా’ అని యూ ట్యూబ్ వాళ్లు పెద్ద పెద్ద హెడ్డింగులు పెడ‌తార‌ని, కానీ తానెప్పుడూ రోజాని ఏం అన‌లేద‌ని, కానీ యూ ట్యూబ్ వాళ్లు కూడా బ‌త‌కాలి క‌దా అని కౌంట‌ర్ వేశాడు హైప‌ర్ ఆది.