ఏ దేశమేగినా మూలాలను మరువని భారతీయులు, తమ మాతృభూమిపై మమకారాన్ని చాటుతూనే ఉంటారు. భారత స్వాతంత్ర్య దినోత్సవ సందర్భంగా అమెరికా న్యూజెర్సీలో సుమారు 38 వేల మంది ఇండియా డే పరేడ్ ఘనగా నిర్వహించారు. ఎడిసన్ లో మొదలైన పరేడ్, వుడ్ బ్రిడ్జ్ సమీపంలోని ఇండియన్ స్క్వేర్ వద్ద ముగిసింది.
సుమారు రెండు కిలోమీటర్ల పరేడ్ కన్నుల పండుగ్గా సాగింది. బ్యాండ్ బృందాలు ఫుల్ జోష్ తో సంగీతాన్ని వినిపిస్తుంటే ప్రవాస భారతీయులు డాన్స్ చేస్తూ, నినాదాలు చేస్తూ ఉత్సాహంగా ఊరేగింపుగా ముందుకు సాగారు. బృందాలుగా విడిపోయి విభిన్నమైన స్లోగన్స్ ఇస్తూ, పాటలు పాడుతూ ఆడుతూ పాడుతూ ఈ వేడుకను చిరస్మరణీయంగా మార్చేశారు. ప్రపంచంలో ఉన్న జోష్ మొత్తం న్యూజెర్సీలోనే ఉందా అనేటంత సందడిగా ఈ వేడుకను జరుపుకొన్నారు.
న్యూ జెర్సీలోని వందకు పైగా సంస్థలు ఇందులో పాలుపంచుకున్నాయి. ఎడిసన్, మిడిల్ సెక్స్ ప్రాంతంలో భారతీయులు పెద్ద సంఖ్యలో నివసిస్తున్నారు. ఇక్కడి జనాభాలో భారతీయులు దాదాపు 13 శాతం మంది. అందుకే ఇండియా డే అంత గ్రాండ్ గా జరిగింది. ఈ వేడుకకు పలువురు సెలెబ్రిటీలు హాజరయ్యారు. సినీ తారలు మదాలసా శర్మ, సమీక్షా సింగ్, ప్రాచీ షా, సుజాతా మెహతా, టాక్ షో యాంకర్ రిచా అనిరుధ్ ఈ కార్యక్రమంలో పాల్గొన్నారు. ఇండియా డే పరేడ్ పేరుతో వేడుక నిర్వహించడం ఇది 11వ సారి కావడం విశేషం.
భారత దేశం 69వ స్వాతంత్ర్య దినోత్సవం జరుపుకొనే వేళ, అమెరికాలోనూ అనేక చోట్ల ఈ వేడుకను నిర్వహించారు. అందులోనూ న్యూజెర్సీ పరేడ్ అందరి దృష్టినీ ఆకర్షించింది.
