పాపం… న‌రేష్‌. 2016 వెళ్తూ వెళ్తూ త‌న‌కు మ‌రో డిజాస్ట‌ర్ ఇచ్చిపోయింది. గ‌త‌వారం విడుద‌లైన న‌రేష్ సినిమా ఇంట్లో దెయ్యం నాకేం భ‌యం సినిమా డిజాస్ట‌ర్‌ల జాబితాలో చేరిపోయింది. 2016 ఆఖ‌రి అట్ట‌ర్ ఫ్లాప్ అదే! 2016లో వ‌చ్చిన సెల్ఫీరాజా కూడా ఫ్లాప్ అవ్వ‌డంతో న‌రేష్ ప‌రిస్థితి మ‌రీ దారుణంగా త‌యారైంది. ఈ సినిమాకి రూ.6 కోట్ల వ‌ర‌కూ బ‌డ్జెట్ అయ్యింద‌ట‌. అందులో కోటి రూపాయ‌లు కూడా వెన‌క్కివచ్చే ప‌రిస్థితి లేద‌ని ట్రేడ్ వ‌ర్గాలు చెబుతున్నాయి. న‌రేష్ సినిమా అంటే బీ,సీల్లో మంచి వ‌సూళ్లు క‌నిపిస్తాయి. పైగా ఇది హార‌ర్ కామెడీ జోన‌ర్‌లో తెరకెక్కిన సినిమా. కాబ‌ట్టి.. ఈసారి న‌రేష్‌కి అక్క‌డ క‌ల‌సి రావ‌డం ఖాయ‌మ‌నుకొన్నారంతా. కానీ… బీ,సీల ఆడియ‌న్స్ కూడా న‌రేష్ సినిమాని ప‌ట్టించుకోలేదు. ఆదివారం, అందులోనూ 1వ తారీఖు వ‌సూళ్లు ఏ రేంజులో ఉండాలి?? కానీ 50 శాతం కూడా టికెట్లు తెగ‌క‌పోవ‌డం న‌రేష్ దుస్థితికి అద్దం ప‌డుతోంది.

న‌రేష్ సినిమాతో పాటు విడుద‌లైన‌… అప్ప‌ట్లో ఒక‌డుండేవాడు డీసెంట్ టాక్‌తో మంచి వ‌సూళ్లు అందుకొంటోంది. త‌క్కువ బ‌డ్జెట్‌తో తెర‌కెక్కిన సినిమా కావ‌డం ఈ సినిమాకి ప్ల‌స్ అయ్యింది. క్లాస్ ప్రేక్ష‌కుల‌కు న‌చ్చే అంశాలు ఉండ‌డంతో అప్ప‌ట్లో… దూసుకుపోతోంది. వ‌సూళ్ల మాట అటుంచితే… మంచి ప్ర‌య‌త్నం చేశారంటూ చిత్రబృందాన్ని మెచ్చుకోవ‌డం, అన్నిచోట్ల నుంచి ప్ర‌సంశ‌లు ల‌భించ‌డంతో… నారా రోహిత్ అండ్ టీమ్ సంబ‌రాలు చేసుకొంటోంది. న‌రేష్ సినిమాకి మాత్రం పబ్లిసిటీ ఖ‌ర్చులైనా మిగుల‌తాయా అనే అనుమానం వేస్తోంది. తొలిరోజే ఫ్లాప్ టాక్ రావ‌డంతో థియేట‌ర్ వైపుకు వెళ్ల‌డానికి కూడా ఆడియ‌న్స్ భ‌య‌ప‌డుతున్నారు. ఈ రిజ‌ల్ట్ న‌రేష్ రాబోయే సినిమాల‌పై దారుణంగా ప‌డే అవ‌కాశం ఉంది.