టాలీవుడ్ లో జక్కన్న అనగానే అందరికీ డైరెక్టర్ రాజమౌళినే గుర్తొస్తాడు. సినిమాలో ప్రతి ఫ్రేమ్ లోనూ తన మార్క్ ఉండేలా చూసుకుంటాడు జక్కన్న. అసలు ఆయనకు ఆ పేరు రావడానికి కారణం జూనియర్ ఎన్టీఆర్. సినిమా కోసం రాజమౌళి పడే తపన చూసి జూనియర్ ముద్దుగా జక్కన్న పేరు పెట్టుకుంటే.. అది చివరికి అలా అలా ఫిక్స్ అయిపోయింది.
ఇప్పుడు జూనియర్ ఎన్టీఆర్ కి మరో జక్కన్న కనిపిస్తున్నాడని ఫిలిం నగర్ టాక్. రాజమౌళి స్టైల్లో కాకపోయినా.. తనకంటూ ఓ స్పెషల్ క్యారెక్టర్ క్రియేట్ చేసుకున్నాడు డైరెక్టర్ సుకుమార్. ఆయన పేరుకు సుకుమారుడే అయినా.. నటీనటుల నుంచి యాక్టింగ్ రాబట్టడంతో ఏమాత్రం కాంప్రమైజ్ కాడని సమాచారం. అందుకే సుకుమార్ సినిమాల షూటింగ్ కూడా అనుకున్న షెడ్యూల్ కంటే కొంచెం లేట్ అవుతూ ఉంటుంది. పర్ ఫెక్షన్ కోసం సుకుమార్ చేసే ప్రయత్నమే అందుకు కారణమని ఆయన యూనిట్ లో పనిచేసిన ఎవరైనా చెబుతారు.
తాజాగా సుకుమార్ డైరెక్షన్ లో నాన్నకు ప్రేమతో.. సినిమా చేశాడు జూనియర్ ఎన్టీఆర్. అసలు వీళ్లిద్దరి కాంబినేషన్ లో ఎప్పుడో సినిమా రావాల్సింది. ఆర్య స్టోరీని జూనియర్ కోసమే రెడీ చేశాడు సుక్కు. కానీ.. అది మిస్సై.. అల్లు అర్జున్ కి మంచి హిట్ ఇచ్చింది. ఆ తర్వాత ఇప్పుడు వీళ్లిద్దిరి కాంబోలో మూవీ వస్తోంది. ఈ మూవీ షూటింగ్ సందర్భంగా సుకుమార్ వర్కింగ్ స్టైల్ లో పర్ ఫెక్షన్ ని చూసి.. రాజమౌళిని గుర్తుచేసుకున్నాడట ఎన్టీఆర్. అంటే సుక్కు మరో జక్కన్న అని అనుకున్నట్టేనా..!
