పూరి కొత్త సినిమాకీ లీకేజీల గోల త‌ప్ప‌లేదు. సినిమా విడుదల‌కు ముందే కొన్ని సీన్లు లీక్ చేయ‌డం ఓ ప‌ద్ధ‌తి. ఇప్పుడు ఏకంగా.. స్క్రిప్టు మొత్తాన్ని బ‌య‌ట పెట్టేశారు. ఓ యువ‌కుడు `ఇస్మార్ట్ శంక‌ర్‌` స్క్రిప్టుని ఇన్‌స్ట్రాగ్రామ్ లో పోస్ట్ చేసేశాడు. దాంట్లో సీన్ నెం 1 నుంచి శుభం కార్డు వ‌ర‌కూ డైలాగ్ వెర్ష‌న్‌తో స‌హా అన్నీ ఉన్నాయి. వెంట‌నే పూరి, ఛార్మిలు పోలీసుల్ని ఆశ్ర‌యించారు. ముర‌ళీ కృష్ణ అనే యువ‌కుడు ఈ స్క్రిప్టు మొత్తాన్ని లీక్ చేశాడ‌ని పోలీసులు నిర్ధార‌ణ‌కు వ‌చ్చారు. పోస్ట్ తీసేయ‌డానికి ముర‌ళీ కృష్ణ భారీగా డ‌బ్బులు డిమాండ్ చేస్తున్నాడ‌ని ఛార్మి పోలీసులకు ఫిర్యాదు చేయ‌డంతో పోలీసులు ముర‌ళీ కృష్ణ‌పై కేసు ఫైల్ చేశారు.
క‌థ చెప్పిన‌ప్పుడే కొంత‌మంది కీల‌క న‌టీన‌టులకు, సాంకేతిక నిపుణుల‌కు స్క్రిప్టు కాపీ ఇవ్వ‌డం పూరికి అల‌వాటు. అలాంటి ఓ స్క్రిప్టు కాపీ చేతులు మారుతూ… ముర‌ళీకృష్ణ కు చేరింది. దాంతో ముర‌ళీకృష్ణ దాన్ని అప్‌లోడ్ చేసేశాడు. చిత్ర‌బృందం ముందుగా స్పందించ‌డంతో.. ఆ స్క్కిప్టు వైర‌ల్ కాక‌మునుపే ఆప‌గ‌లిగేవారు. లేదంటే… క‌థ మొత్తం తెలిసిపోయి, ఆ కిక్ పోయేది.
