కరోనా పాజిటివ్ కేసులు.. తెలుగు రాష్ట్రాల్లో అంతకతకూ పెరిగిపోతున్నాయి. ఎన్ని బెడ్లు ఏర్పాటు చేసినా… కోవిడ్ ఆస్పత్రులు ఏర్పాటు చేసినా సరిపోని పరిస్థితి. లక్షణాలు లేని.. ఓ మాదిరి లక్షణాలు ఉన్న కరోనా పేషంట్లే సగానికిపైగా ఉంటున్నారు. వారిని ఆస్పత్రికి తీసుకెళ్లకపోతే.. సూపర్ స్ప్రెడర్లుగా మారుతారేమోనని బయం… తీసుకెళ్తే.. సీరియస్ పేషంట్లకు బెడ్లు సరిపోవని… ప్రభుత్వానికి భారం అవుతుందేమోననే ఆందోళన. అందుకే.. ఇక కరోనా పాజిటివ్ వచ్చిన వారికి.. ఇంటికే.. ఐసోలేషన్ కిట్లు పంపాలని నిర్ణయించుకున్నారు. ఈ మేరకు రెండు రాష్ట్రాల ప్రభుత్వాలు.. కిట్లలో ఏమేమి ఉంటాయో ప్రకటనలు.. ఫోటోలు విడుదల చేస్తున్నాయి.

కరోనా వచ్చిన చాలా మందికి ప్రాథమిక లక్షణాలే ఉంటున్నాయి. వారందరికీ ఇంటి దగ్గర ట్రీట్‌మెంట్ చాలని.. చెబుతున్నారు. అయితే.. ఏంతో కొంత ట్రీట్‌మెంట్ .. మెడికేషన్ అవసరం. దానిపై.. సరైన అవగాహన ఉండటం లేదు. కావాల్సిన విటమిన్, జింక్ టాబ్లెట్లు దొరకని పరిస్థితి. అందుకే… ఓ ఐసోలేషన్ కిట్‌ను… తీసుకోవాల్సిన జాగ్రత్తలన్నింటినీ వివరిస్తూ.. పంపిణీ చేయాలని నిర్ణయించుకున్నట్లుగా తెలుస్తోంది. ఇందులో మెడిసిన్ తో పాటు.. మాస్కులు.. గ్లౌజులు.. శానిటైజర్లను కూడా ఉంచుతున్నారు.

అయితే ప్రభుత్వాలు.. పని చేయడం కన్నా.. పబ్లిసిటీనే ఎక్కువగా ఉంటోందన్న విమర్శలు వస్తున్నాయి. ఎవరికీ పంపిణీ చేయకుండానే.. ప్రారంభించకుండానే… ఫోటోలు విడుదల చేసి.. సోషల్ మీడియాల్లో గొప్పగా ప్రచారం చేసుకుంటున్నాయని అంటున్నారు. తెలుగు రాష్ట్రాల్లో ఇప్పటి వరకూ.. ఏ ఒక్కరికీ ఇలాంటి కిట్లు పంపిణీ చేయలేదు కానీ.. పబ్లిసిటీ మాత్రం.. రెండు రాష్ట్రాల ప్రభుత్వాలకు ఫ్యాన్స్ హోరెత్తిస్తున్నారు. హోంక్వారంటైన్‌లో ఉన్న వారు.. తమకు ఐసోలేషన్ కిట్లు అందలేదే అని మథన పడుతున్నారు. కరోనా బారిన పడి హోం ఐసోలేషన్ లో ఉన్న వారికి కిట్లు అందించకుండా.. పబ్లిసిటీ చేసుకుంటే.. ఏం ప్రయోజనం ఉంటుందనే విమర్శలు గట్టిగానే వినిపిస్తున్నాయి.