ఇళయరాజా సంగీతం సుకుమారంగా సున్నితంగా వుంటుంది కానీ ఆయన కాదు. చాలా కఠినమైన వ్యక్తిత్వం ఆయనది. ఇక లావాదేవీలా దగ్గర ఇంకాస్త కటువుగా ఉంటారాయన. తన పాటలని కచేరిల్లో పాడుతున్నారని ప్రాణ స్నేహితుడు బాలుపైనే కోర్టుకు వెళ్లి ముక్కుపిండి రాయాల్టీ వసూలు చేసిన ట్రాక్ రికార్డ్ ఆయనది. ఇపుడు ఆయన బయోపిక్ తీయాలని కొందరు దర్శకులు ఆశపడుతున్నారు. దర్శకుడు ఆర్ బాల్కీకి ఇళయరాజా అంటే పిచ్చి. ఆయన సినిమాలన్నిటికీ ఇళయరాజానే మ్యూజిక్. ధనుస్ టైటిల్ రోల్ లో ఇళయరాజా బయోపిక్ తీయాలని ఆయన ఆశపడుతున్నాడు. ఆయన ప్రయత్నాల్లో ఆయన వున్నాడు.
అయితే ఆ బయోపిక్ సెట్స్ పైకి వెళ్ళడం అంత సులువుగా కనిపించడం లేదు. బయోపిక్ తీయాలంటే ముందు ఇళయరాజా అనుమతి తీసుకోవాలి. ఇటివలే ఓ నిర్మాత దర్శకుడు ఈ విషయంలో ఆయన్ని కలిస్తే.. రాయాల్టీ కింద దిమ్మతిరిగిపోయే రేటుని డిమాండ్ చేశారట ఇళయరాజా. ఈ రేటు విని ఏం చెప్పాలో అర్ధంకాక అక్కడి నుంచి వెనుతిరిగారు సదరు దర్శక నిర్మాత. వెండితెరపై ఇప్పటికే బోలెడు బయోపిక్ లు వచ్చాయి. ఇళయరాజా బయోపిక్ కి కూడా డిమాండ్ వుంది. ఐతే ఈ బయోపిక్ కి మొదటి అడ్డంకి ఇళయరాజే కావడం గమనార్హం.
