వైఎస్.రాజ‌శేఖ‌ర్ రెడ్డి జీవిత క‌థ ఆధారంగా తెర‌కెక్కిన చిత్రం `యాత్ర`. వైఎస్ఆర్ జీవితాన్ని పూర్తిగా ఆవిష్క‌రించిన చిత్ర‌మిది. ఆయ‌న అభిమానుల‌కు బాగా న‌చ్చింది. ఈ క‌థ‌ని… ద‌ర్శ‌కుడు మ‌హి. వి.రాఘ‌వ తెర‌కెక్కించిన విధానం విమ‌ర్శ‌కుల‌కూ న‌చ్చింది. ఇప్పుడు `యాత్ర 2`కి శ్రీ‌కారం చుట్టారు. యాత్ర‌లో వైఎస్ఆర్ జీవిత క‌థ చెబితే, ఇప్పుడు వైఎస్ జ‌గ‌న్ క‌థ‌ని చూపించ‌బోతున్నారు. వైఎస్.ఆర్ మ‌ర‌ణం ద‌గ్గ‌ర్నుంచి, జ‌గ‌న్ సీ.ఎం. అయ్యేంత వ‌ర‌కూ ఈ క‌థ సాగ‌బోతోంద‌ని స‌మాచారం. అయితే.. జ‌గ‌న్ పాత్ర‌లో ఎవ‌రు క‌నిపిస్తారు? అనే ఆస‌క్తి అంత‌టా నెల‌కొంది. త‌మిళ న‌టుడు సూర్య జ‌గ‌న్ గా క‌నిపిస్తార‌ని ప్ర‌చారం సాగింది. అయితే.. ఇప్పుడు ఆ పాత్ర కోసం ప్ర‌తీక్ గాంథీని ఎంచుకున్న‌ట్టు స‌మాచారం.
`1992 – స్కామ్` – వెబ్ సిరీస్‌తో ఆక‌ట్టుకున్న న‌టుడు ప్ర‌తీక్ గాంథీ. త‌న‌లో జ‌గ‌న్ పోలిక‌లు కొన్ని క‌నిపిస్తాయి. అందుకే మ‌హి. వి.రాఘ‌వ ప్ర‌తీక్ గాంథీని సంప్ర‌దించిన‌ట్టు స‌మాచారం అందుతోంది. క‌థ ఎప్పుడో పూర్త‌యింది. మిగిలిన న‌టీన‌టులు, సాంకేతిక నిపుణుల ఎంపిక జ‌రుగుతోంది. యాత్ర‌లో న‌టించిన వాళ్లే… ఇక్క‌డా క‌నిపించొచ్చు. ష‌ర్మిళ, విజ‌య సాయిరెడ్డి లాంటి పాత్ర‌లు కొత్త‌గా వ‌స్తాయంతే. నేటి స‌మకాలీన రాజ‌కీయాలూ తెర‌పై చూపించాల‌నుకుంటే పవన్ క‌ల్యాణ్ ని పోలిన పాత్ర‌ల్నీ చూపించాల్సివ‌స్తుంది. మ‌రి రాఘ‌వ ఆలోచ‌న‌లు ఎలా ఉన్నాయో.??
