నాన్న‌కు ప్రేమ‌తోలో జ‌గ‌ప‌తిబాబుని చాలా స్టైలీష్‌గా చూపించాడు సుకుమార్. ఎన్టీఆర్ క్యారెక్ట‌రైజేష‌న్ త‌ర‌వాత.. అంత‌గా ఆక‌ట్టుకొన్న‌ది విల‌న్‌గా జ‌గ్గూభాయ్‌నే. ఇప్పుడు మ‌రోసారి సుకుమార్ జ‌గ్గూకోసం అలాంటి స‌రికొత్త క్యారెక్టర్ డిజైన్ చేశాడు. సుకుమార్ ద‌ర్శ‌క‌త్వంలో రామ్ చ‌ర‌ణ్ క‌థానాయ‌కుడిగా ఓ చిత్రం రూపొందుతున్న సంగ‌తి తెలిసిందే. మైత్రీ మూవీస్ సంస్థ నిర్మిస్తున్న ఈ చిత్రంలో స‌మంత క‌థానాయిక‌గా న‌టిస్తోంది. ప్ర‌ధాన విలన్ పాత్ర జ‌గ‌ప‌తిబాబుకి ద‌క్కింది. ఇటీవ‌ల జ‌గ‌ప‌తిబాబుని క‌లుసుకొన్న సుకుమార్ క‌థంతా చెప్పాడ‌ట. జ‌గ్గూ భాయ్ క్యారెక్టర్, గెట‌ప్‌.. వీటి గురించిన డిస్క‌ర్ష‌న్‌ ఇద్ద‌రి మ‌ధ్య చాలాసేపు జ‌రిగింద‌ట. సుక్కుపై న‌మ్మ‌కంతో మ‌రో మాట లేకుండా.. ఈ సినిమాపై సంత‌కం చేశాడ‌ట జ‌గ‌ప‌తిబాబు.
ఖైదీ నెం.150లో ప్ర‌తినాయ‌కుడిగా ముందు జ‌గ‌ప‌తిబాబు పేరే అనుకొన్నారు. ఆ ఛాన్స్ వ‌చ్చిన‌ట్టే వ‌చ్చి చేజారింది. దాంతో అప్ప‌ట్లో చిరు ఫ్యామిలీపై కాస్త గుర్రుగానే ఉండేవాడు జగ్గూభాయ్. చ‌ర‌ణ్ సినిమాతో ఆ కోపం కాస్త త‌గ్గే అవ‌కాశం ఉంది. చ‌ర‌ణ్ ఈ సినిమాలో మూగ‌వాడిగా న‌టిస్తున్నాని, స‌మంత‌కు చెవుడ‌ని ర‌క‌ర‌కాల గాసిప్పులు చ‌క్క‌ర్లు కొడుతున్నాయి. మ‌రి జ‌గ‌ప‌తిబాబుకి కూడా అలాంటి లోపాలున్నాయో లేదో..?
