దేవ్.. జ‌న‌సేన‌లో రాజ‌కీయ చాణ‌క్యుడు కాబోతున్నాడ‌నే బిల్డ‌ప్ తో ప‌వ‌న్ క‌ల్యాణ్ ప‌రిచయం చేశారు! ఇంత‌కీ ఎవ‌రీ దేవ్‌, ఏమా క‌థ అనేది ‘తెలుగు 360’ వెలుగులోకి తెచ్చిన సంగ‌తి తెలిసిందే. ఒక సాధార‌ణ గ‌ల్లీ నాయ‌కుడికి తీసుకొచ్చి, ఏకంగా అంత‌ర్జాతీయ స్థాయి రాజ‌కీయ వ్యూహ‌క‌ర్త‌గా ప‌వ‌న్ ప‌రిచ‌యం చేయ‌డం, ఆ త‌రువాత వాస్త‌వాలు బ‌య‌ట‌ప‌డటంతో జ‌న‌సేన వ‌ర్గాలు ఒక్క‌సారి ఖంగుతిన్నాయి. దేవ్ నియామ‌కం, త‌ద‌నంత‌ర ప‌రిణామాల నేప‌థ్యంలో ప్ర‌స్తుతం జ‌న‌సైనికుల్లో ఒక ఆస‌క్తిక‌ర‌మైన అంశంపై చ‌ర్చ జరుగుతోంది. చ‌ర్చ అనే కంటే.. జోకులు పేలుతున్నాయ‌ని చెప్పుకోవ‌చ్చు!

మొన్న‌, వాసుదేవ్ ని ప‌వ‌న్ క‌ల్యాణ్ ఒక్క‌సారిగా ప‌రిచ‌యం చేసేస‌రికి… జ‌న‌సేన వ‌ర్గాల‌న్నీ ఆయ‌న్ని ఒక రేంజిలో ఊహించుకున్నాయి! వాసుదేవ్ ప‌రిచ‌య ఉప‌న్యాసం వినేస‌రికి… ప‌వ‌ర్ ప‌వ‌ర్ కి దేవ్ వ్యూహాలు క‌లుస్తే ర‌చ్చ‌ర‌చ్చే అనేసుకున్నారు. ఈ ఉత్సాహంలో ఊపులో కొంత‌మంది జ‌న‌సేన కార్య‌క‌ర్త‌లు దేవ్ తో చ‌క‌చ‌కా సెల్ఫీలు దిగేశారు. సోషల్ మీడియాలో వెంట‌నే డీపీలు మార్చేసుకున్నారు. 175 నియోజ‌క వ‌ర్గాల్లో జనసేన పోటీ గ్యారంటీ అని ప‌వ‌న్ అంటున్నారు క‌దా! ఈ నేప‌థ్యంలో కొంత‌మంది ఆశావ‌హులు కూడా ఇప్ప‌ట్నుంచే దేవ్ తో స‌న్నిహితంగా ఉంటే బాగుంటుందేమో అనుకున్నారు. ముంద‌స్తు ప‌రిచ‌యానికి సాక్ష్యంగా ఉంటుంద‌న్న ఉద్దేశంలో సెల్ఫీలు దిగి సేవ్ చేసుకున్నారు!

అయితే, దేవ్ నేప‌థ్యం గురించి, ఆయ‌న బిల్డ‌ప్ గురించి అస‌లు విష‌యం బ‌య‌ట‌ప‌డ‌గానే.. సెల్ఫీలు దిగిన జ‌న‌సైనికులు ఖంగుతిన్నారు! ఆ త‌రువాత‌, జోకులు వేసుకోవ‌డం ప్రారంభించార‌ట‌. ‘ఈయ‌న సెలెబ్రిటీ అనుకుని సెల్ఫీలు దిగేస్తే.. ఇదేంటి ఇలా జ‌రిగింద‌’ని సన్నిహితులతో వాపోతున్నారట. తొంద‌ర‌ప‌డి సోష‌ల్ మీడియాలో గొప్ప‌ల‌కుపోయి ఆ సెల్ఫీల‌తో పోస్టులు పెట్టేశామ‌నీ, ఇప్పుడు వాటికి వ‌స్తున్న కామెంట్లు చూసి పోస్టుల‌ను డిలీట్ చేయాల్సి వ‌చ్చింద‌ని జ‌న‌సైనికులు స‌న్నిహితుల‌తో చెప్పుకుంటున్నారు! మొత్తానికి, దేవ్ ఎపిసోడ్ జ‌న‌సేన‌లో ఒక సంచ‌ల‌న‌మే అయింది. అంతలోనే అద్భుతం, ఆ వెంటనే ఆశ్చర్యం కలిగించిన పరిణామం ఇది.