బీజేపీ హైకమాండ్‌తో సన్నిహిత సంబంధాలు కొనసాగిస్తున్న వైసీపీ.. రాష్ట్రంలో మాత్రం.. ఆ పార్టీ నేతల్ని తరిమి తరిమికొడుతూండటం … రాష్ట్ర నాయకులను అసహనానికి గురి చేస్తోంది. స్థానిక ఎన్నికల్లో జనసేన పార్టీతో కలిసి పోటీ చేసి. ఎన్నో కొన్ని స్థానాలు గెలుచుకుని ఉనికి చాటుకుందామంటే… వైసీపీ.. దాడులతో నామినేషన్లు కూడా వేయనివ్వలేదు. మేనిఫెస్టోను ఆవిష్కరించే సమయంలో.. మేనిఫెస్టోలోని అంశాల కంటే.. తమపై జరుగుతున్న దాడుల గురించి అటు జనసేన చీఫ్.. ఇటు బీజేపీ ఏపీ చీఫ్.. మాట్లాడారు. చిత్తూరు జిల్లాలో జనసేన, బీజేపీ నేతలపై జరిగిన దాడులు దారుణమని ఇద్దరు నేతలు మండిపడ్డారు. శేషన్ లాంటి ఎన్నికల అధికారి ఉంటే .. ఇలాంటి పరిస్థితి వచ్చేది కాదని పవన్ కల్యాణ్ ఆవేదన వ్యక్తం చేశారు. ఎన్నికల సంఘం కూడా ఆలోచించాలని.. దారుణాలు నియంత్రణ చేసేలా చర్యలు తీసుకోవాలని పవన్ డిమాండ్ చేశారు. ఈ అంశాలను గవర్నర్, కేంద్రం దృష్టి కి తీసుకెళతామని.. ఇప్పటికే బీహార్ ను మించి ఎపి లో హింస అనే చర్చ నడుస్తుందన్నారు.

ఏపీ బీజేపీ చీఫ్.. కన్నా లక్ష్మినారాయణ .. వైసీపీపై మరింత తీవ్రంగా విరుచుకుపడ్డారు. ఒక ఆర్డినెన్స్ తెచ్చి అన్ని సీట్లు తీసుకుంటే పోయేదని..ఇప్పుడు.. వైసీపీ నేతల గూండాయిజానికి.. అరాచకానికి.. జగన్ నియంతృత్వానికి ఫ్యాక్షనిజం తోడు చేసి.. రాష్ట్రాన్ని నాశనం చేస్తున్నారని మండిపడ్డారు. టెండర్ పత్రాలు లాక్కెళ్లినట్లు .. నామినేషన్ పత్రాలు చించేస్తున్నారని.. ఎన్నికల సంఘానికి చెప్పినా ప్రయోజనం లేదని విమర్శించారు. పోలీసులే విత్ డ్రా చేసుకోకపోతే చంపేస్తామని బెదిరిస్తున్నారని మండిపడ్డారు. తన రాజకీయ జీవితం లో ఈ తరహా ఎన్నికలు ఎప్పుడూ చూడలేదన్నారు. గూండాయిజానికి బ్రేక్ వేయాలంటే వైసిపిని ఓడించాలని పిలుపునిచ్చారు. జగన్మోహన్ రెడ్డి తెచ్చిన ఆర్డినెన్స్ విషయంలో… ఆయన తన పార్టీకి కూడా కట్టుబడి ఉండాలని కన్నా డిమాండ్ చేశారు.

ఓ వైపు వైసీపీ నత్వానీని రాజ్యసభకు పంపడంలో.. బీజేపీ ఆదేశం ఉందని.. బయట ప్రచారం జరుగుతోంది. వైసీపీ, బీజేపీ మధ్య లోపాయికారీ సంబంధాలు ఉన్నాయని.. ఢిల్లీలోనూ చెప్పుకుంటున్నారు. ఇలాంటి సమయంలో.. తమ పార్టీ నేతలపై దాడులు జరుగుతున్నా… ప్రభుత్వంపై తీవ్ర స్థాయిలో విరుచుకుపడలేని నిస్సహాయ స్థితికి బీజేపీ – జనసేన పార్టీలు చేరుకున్నట్లుగా కనిపిస్తోంది. ఎన్నికల తీరుపై ఆవేదన చెందడమే తప్ప.. కేంద్రంలో ఉన్న అధికార పార్టీ నేతలుగా తమ పవర్ ను చూపించలేకపోతున్నారు.