ఇన్నేళ్ల కెరీర్‌లో కాజ‌ల్ ప్ర‌యోగాలు చేసిందేం లేదు. ఎక్కువ సార్లు సేఫ్ గేమ్ ఆడింది. `సీత‌`లో మాత్రం కాస్త నెగిటీవ్ ఛాయ‌లున్న పాత్ర పోషించింది. అయితే ఆ సినిమా ఆడ‌లేదు. కాక‌పోతే మ‌రోసారి అలాంటి ప్ర‌యోగ‌మే చేయ‌బోతోంద‌ని తెలుస్తోంది. విష్ణు క‌థానాయ‌కుడిగా రూపొందుతున్న చిత్రం `మోసగాళ్లు`. కాజ‌ల్ ప్ర‌ధాన పాత్ర‌ధారి. అయితే ఇందులో కాజ‌ల్ పాత్ర విభిన్నంగా ఉంటుంద‌ని స‌మాచారం. ఈ సినిమాలో కాజ‌ల్ మోస‌గ‌త్తైగా క‌నిపించ‌బోతోంద‌ని తెలుస్తోంది. త‌న పాత్ర‌లో నెగిటీవ్ ల‌క్ష‌ణాలు పుష్క‌లంగా ఉంటాయ‌ట‌. వైట్ కాల‌ర్ మోస‌గాళ్ల నేప‌థ్యంలో తెర‌కెక్కిస్తున్న సినిమా ఇది. ఇందులో కాజ‌ల్ పాత్ర ఆశ్చ‌ర్య‌ప‌రిచేలా రూపొందించార‌ని, క‌థ‌లో ట్విస్టుల‌కు కాజ‌ల్ పాత్ర ప్ర‌ధాన కార‌ణం అవుతుంద‌ని స‌మాచారం. స‌మంత‌, అనుష్క లాంటి సీనియ‌ర్ హీరోయిన్లంతా – క‌మ‌ర్షియ‌ల్ సినిమాల‌కు దూరంగా ఉంటున్నారు. క‌థ‌లో, త‌మ పాత్ర‌లో ఏదైనా వెరైటీ క‌నిపిస్తే త‌ప్ప‌, ఒప్పుకోవ‌డం లేదు. ఇప్పుడు క్ర‌మంగా కాజ‌ల్ కూడా ఆ బాట‌లోనే న‌డుస్తోంద‌న్న‌మాట‌.