త‌న క‌థానాయిక‌ల్ని ఓ రేంజులో చూపించ‌డంలో సిద్ద‌హ‌స్తుడు కృష్ణవంశీ. ఆయ‌న సినిమాలు ఫ్లాప్ అయినా… క‌థానాయిక‌ల‌కు గుర్తింపు, అవ‌కాశాలూ రావ‌డం వెనుక ఉన్న‌కార‌ణం అదే. చందమామ సినిమాలో కాజల్ కూడా భ‌లే ఫ్యామ‌స్ అయిపోయింది. ఆ సినిమాలో నిజంగానే జాబిల్లిలా క‌నిపించిన కాజ‌ల్‌కి వెంట వెంట‌నే స్టార్‌హీరోల‌తో న‌టించే అవ‌కాశం వ‌చ్చింది. అందుకే కృష్ణవంశీ అంటే కాజల్ కి ప్ర‌త్యేకమైన అభిమానం. చందమామ త‌ర‌వాత.. గోవిందుడు అంద‌రివాడేలేలోనూ కాజల్ క‌థానాయిక‌గా న‌టించింది. అందులోనూ కాజ‌ల్‌ని ఓ లెవిల్లో చూపించాడు కృష్ణవంశీ. ఇప్పుడు ముచ్చ‌ట‌గా మూడోసారి ఈ కాంబినేష‌న్ సెట్ కాబోతోంద‌ని టాలీవుడ్ టాక్‌.
కృష్ణవంశీ ద‌ర్శ‌క‌త్వంలో ఓ సినిమా ప‌ట్టాలెక్క‌బోతోంది. సందీప్ కిష‌న్ క‌థానాయ‌కుడు. ఈ చిత్రంలో క‌థానాయిక‌గా కాజ‌ల్‌ని ఎంచుకొన్నార్ట. హీరో సందీప్ కిష‌న్ అయినా.. ఈ సినిమాలో క‌థానాయిక‌దీ `హీరో` రేంజు పాత్ర అని తెలుస్తోంది. అందుకే.. స్టార్ క‌థానాయిక కోసం అన్వేషిస్తున్నాడు కృష్ణవంశీ. సందీప్ కిష‌న్ పక్క‌న అనేస‌రికి స్టార్ హీరోయిన్లు ‘నో ఛాన్స్‌’ అంటూ జారిపోతున్నారు. అయితే ఈ ద‌శ‌లో కృష్ణ‌వంశీకి ఓకే చెప్పేసింది కాజల్. ఈనెల 27న ఈ సినిమా లాంఛ‌నంగా ప్రారంభం కానుంద‌ని తెలుస్తోంది. మ‌రి కాజ‌ల్‌ని ఈసారి కృష్ణవంశీ ఏ స్థాయిలో చూపిస్తాడో మ‌రి.
