లారెన్స్ క‌థానాయకుడిగా ర‌మేష్ వ‌ర్మ ద‌ర్శ‌క‌త్వంలో ఓ చిత్రం రూపుదిద్దుకొంటున్న సంగ‌తి తెలిసిందే. ఏ స్టూడియోస్ సంస్థ నిర్మిస్తోంది. ఈ సినిమా బాలీవుడ్ సూప‌ర్ హిట్ ‘కిల్‌’ రీమేక్ అనుకొన్నారంతా. కానీ కాదు. సోషియో ఫాంట‌సీ థ్రిల్ల‌ర్ గా ఈ చిత్రాన్ని రూపొందిస్తున్నారు. దీనికి ‘కాల‌భైర‌వ‌’ అనే టైటిల్ ప‌రిశీల‌న‌లో వుంది. విజువ‌ల్ ఎఫెక్ట్స్ కి ప్రాధాన్యం ఉన్న చిత్ర‌మిది. కీర్తి సురేష్ ని క‌థానాయిక‌గా ఎంచుకొనే అవ‌కాశాలు క‌నిపిస్తున్నాయి. బాబీ డియోల్ ప్ర‌తినాయ‌కుడిగా న‌టిస్తారు. వీళ్ల‌తో పాటు స‌త్య‌రాజ్ కూడా ప్ర‌ధాన పాత్ర పోషిస్తున్నార‌ని టాక్‌. మొత్తానికి కాస్టింగ్ గ‌ట్టిగానే వుంది. పాన్ ఇండియా స్థాయిలో ఈ చిత్రాన్ని రూపొందిస్తున్నారు. ఇప్ప‌టికే ప్రీ ప్రొడ‌క్ష‌న్ ప‌నులు ప్రారంభ‌మైపోయాయి. ఈ యేడాది చివ‌ర్లో సెట్స్ పైకి వెళ్లే అవ‌కాశాలు ఉన్నాయి.

మ‌రోవైపు ర‌మేష్ వ‌ర్మ ‘కిల్’ రీమేక్ ప‌నుల్నీ స‌మాంత‌రంగా మొద‌లెట్టేశారు. ఏ స్టూడియోస్ సంస్థ ‘కిల్’ రీమేక్ రైట్స్ ద‌క్కించుకొని ర‌మేష్ వ‌ర్మ చేతుల్లో పెట్టింది. ప్ర‌స్తుతం క‌థానాయ‌కుడి కోసం వేట మొద‌లైంది. హీరో ఎవ‌ర‌న్న‌ది డిసైడ్ అయితే, ఆ హీరోకి తగ్గట్టుగా మార్పులు చేర్పులూ చేయాలి. హీరో ఖాయ‌మైతే కానీ, స్క్రిప్టు ప‌నులకు శ్రీ‌కారం చుట్ట‌డం క‌ష్టం. అందుకే ప్ర‌స్తుతం హీరోని ఫిక్స్ చేసే ప‌నిలో ర‌మేష్ వ‌ర్మ బిజీగా ఉన్నార‌ని ఇన్ సైడ్ వ‌ర్గాల టాక్‌.